შესაბამისი განცხადებები ნაციონალური მოძრაობის წევრებმა დღეს, 10 ნოემბერს გააკეთეს.

რატომ არის მნიშვნელოვანი: გუშინ, 9 ნოემბერს ენმ-ის წევრთა ნაწილმა ყველა დონეზე შიდაპარტიული არჩევნები მოითხოვა. მათი თქმით, თავიდან უნდა აირჩიონ პოლიტიკური სამდივნო, პოლიტიკური საბჭო და საჭიროა თავმჯდომარის არჩევნებიც.

  • ენმ-ის თავმჯდომარის, ნიკა მელიას შეფასებით, კოლეგებს ახალი არაფერი უთქვამთ და ამ საკითხებზე შიდაპარტიული, აქტიური, ყოველდღიური მსჯელობა მიმდინარეობდა კონსოლიდირებული პოზიციის ჩამოსაყალიბებლად.
  • აცხადებს იმასაც, რომ უახლოესი პერიოდი აუცილებლად გამოაჩენს რა იყო ამ საკითხის "ამ ფორმით, ასე ნაჩქარევად" გამოტანის რეალური მიზეზი და მიზანი, მაშინ, როცა ევროპარლამენტის განცხადებებზე უნდა ესაუბრათ.
  • ქართული ოცნების თავმჯდომარემ, ირაკლი კობახიძემ თქვა, რომ, მისი ინფორმაციით, პარტიის თავმჯდომარე პეტრე ცისკარიშვილი იქნება.

ცისკარიშვილის განცხადებით, კანდიდატურის დაყენებას არ აპირებს და ეს ინფორმაცია სიმართლეს არ შეესაბამება.

  • ფორმულას კითხვაზე, მიიღებს თუ არა მონაწილეობას არჩევნებში, თუ პარტიის ნაწილმა მოითხოვა ეს, ცისკარიშვილი ამბობს:
  • "ასე ხომ არ ხდება, დილას იღვიძებ და უი, ვიღაცებს დავუსახელებივარ. შენს მაგივრად ვერ იღებენ გადაწყვეტილებას, შეიძლება ვიღაცამ დაგასახელოს, მაგრამ ჯერ შენ გითანხმებენ ხოლმე, ნებისმიერ თანამდებობაზე".
  • მისივე თქმით, პარტიის შიგნით ამ საკითხებზე დისკუსია აქამდეც ჰქონიათ, თუმცა ასეც რომ არ ყოფილიყო, პარტიის წევრების იდეა ყურადსაღებია და მიესალმება.

დეკანოიძე ამბობს, რომ კანდიდატურის დაყენებას არც თვითონ განიხილავს და ასეთი შემოთავაზებაც არ ყოფილა.

  • "მე არ ვარ ადამიანი, ვის მაგივრადაც შეიძლება სხვებმა მიიღონ გადაწყვეტილება, ამიტომ რეალურად, ახლა ძალიან მნიშვნელოვანია ენმ-სთვის, პირველ რიგში, მიხეილ სააკაშვილის ჯანმრთელობის მდგომარეობა".
  • "არჩევნები არის დემოკრატიული პროცესი, არავინ არჩევნების წინააღმდეგ არ ყოფილა, მე ჩემს კანდიდატურას არც განვიხილავ, არც განმიხილავს, იმიტომ რომ რეალურად ვთვლი, რომ, მათ შორის პარლამენტში და პარტიაში ძალიან მნიშვნელოვანი ფუნქცია მაქვს".

მანამდე, ლევან ხაბეიშვილმა განაცხადა, რომ არჩევნებში მონაწილეობას არ გეგმავს.