ამის შესახებ ლევან ხაბეიშვილმა კომენტარი ჟურნალისტებთან გააკეთა.

რატომ არის მნიშვნელოვანი: გუშინ, 9 ნოემბერს პარტიის წევრთა ნაწილმა ყველა დონეზე შიდა პარტიული არჩევნები მოითხოვეს. მათი თქმით, თავიდან უნდა აირჩიონ პოლიტიკური სამდივნო, პოლიტიკური საბჭო და საჭიროა თავმჯდომარის არჩევნებიც.

  • ენმ-ის თავმჯდომარის, ნიკა მელიას შეფასებით, კოლეგების ახალი არაფერი უთქვამთ და ამ საკითხებზე შიდაპარტიული, აქტიური, ყოველდღიური მსჯელობა მიმდინარეობდა კონსოლიდირებული პოზიციის ჩამოსაყალიბებლად.
  • აცხადებს იმასაც, რომ უახლოესი პერიოდი აუცილებლად გამოაჩენს რა იყო ამ საკითხის "ამ ფორმით, ასე ნაჩქარევად" გამოტანის რეალური მიზეზი და მიზანი, მაშინ, როცა ევროპარლამენტის განცხადებებზე უნდა ესაუბრათ.

დეტალები: ენმ-ის დეპუტატი ლევან ხაბეიშვილი ამბობს, რომ პარტიის ახალი თავმჯდომარის არჩევნები მალე უნდა ჩატარდეს, რადგან "დასაკარგი დრო არ არის".

  • "ამ პარტიას სჭირდება გადახალისება, ამ პარტიის თავმჯდომარეს, ვინც იქნება, სჭირდება ლეგიტიმაცია მისი ამომრჩევლისგან და მეტიც. ეს პარტია უნდა დაუბრუნდეს ამომრჩეველს";
  • "არჩევნები უნდა გამოვიყენოთ შესაძლებლობად. არჩევნები უნდა გამოვიყენოთ გასაძლიერებლად და შესაბამისად, უზრუნველვყოთ ისეთ პარტიული სტრუქტურის ჩამოყალიბება, რომელიც წინააღმდეგობას გაუწევს და დაამარცხებს რუს ოლიგარქს", — ამბობს ის.

გარდა ამისა, ხაბეიშვილი ამბობს, რომ პარტიის რაიონული ორგანიზაციების თავმჯდომარეების 80% ემხრობა თავმჯდომარის არჩევნებს და ცვლილებებს.

  • მისი თქმით არ შეიძლება, პარტიზანები ეძახო შენს თანამებრძოლებს.
  • "ეს არის წარმოუდგენელი დამოკიდებულება პარტიის წევრების, საკრებულოს არჩეული წევრების მიმართ. ამიტომ, მოგიწოდებთ სიმშვიდისკენ, ერთიანობისკენ".
  • ლევან ხაბეიშვილი თანაგუნდელებს მიმართავს, რომ არჩევნები შესაძლებლობად და გაძლიერების შანსად გამოიყენონ.