საერთაშორისო გამჭვირვალობა — საქართველო პარლამენტში იურიდიულ საკითხთა კომიტეტის მიერ დაინიცირებული კანონპროექტის შესახებ განცხადებას ავრცელებს.

რატომ არის მნიშვნელოვანი: ქართული ოცნება ანტიკორუფციულ ბიუროს ქმნის. ბიუროს შექმნის მიზანი, ევროკავშირის წევრობის კანდიდატის სტატუსის მისანიჭებლად, ევროკომისიის მიერ გაცემული 12 რეკომენდაციის მე-4 პუნქტია.

• კანონპროექტის მიხედვით, ახალი უწყების ფუნქცია კორუფციის წინააღმდეგ ბრძოლის ხელშეწყობა იქნება.
• ბიუროს ხელმძღვანელს საქართველოს პრემიერ-მინისტრი დანიშნავს.

დეტალები: საერთაშორისო გამჭვირვალობა — საქართველოს განმარტებით, შემოთავაზებული რეფორმა არ პასუხობს ევროკომისიის მიერ გაცემულ მე-4 რეკომენდაციას.

• არასამთავრობო ორგანიზაციის თქმით, დაგეგმილი რეფორმა არ მოიცავს არც სხვადასხვა საკვანძო ანტიკორუფციული ფუნქციის თავმოყრას, არც რეალური დამოუკიდებლობის გარანტიის შექმნას და არც მაღალი დონის კორუფციის შემთხვევების წინააღმდეგ ბრძოლას.
• მათივე შეფასებით, ეს გულისხმობს, მხოლოდ და მხოლოდ, მთავრობის ადმინისტრაციაში ამჟამად არსებული ეროვნული ანტიკორუფციული საბჭოს სამდივნოს ფუნქციების ცალკე სსიპ-ად გამოყოფას, რაც აცდენილია ევროკომისიის მოთხოვნას.

გარდა ამისა, განცხადებაში საუბარია გამოცხადებულ რეფორმაზე, რომელიც არ პასუხობს კორუფციასთან დაკავშირებით ქვეყნის წინაშე არსებულ გამოწვევებს — მაღალი დონის კორუფციის ზრდასა და სახელმწიფოს მიტაცების გაღრმავებას.

• შესაბამისად, TI ამბობს, რომ მხოლოდ შემოთავაზებული რეფორმის გატარება ვერ ჩაითვლება რეკომენდაციის შესრულებად, რამაც შეიძლება ქვეყანას დააკარგვინოს კანდიდატის სტატუსის მოპოვების შესაძლებლობა.
• ამიტომ ორგანიზაცია ხელისუფლება მოუწოდებს, გადახედონ მე-4 რეკომენდაციასთან დაკავშირებით მათ მიერ არჩეულ მიდგომას და ყველაფერი გააკეთონ იმისათვის, რომ ეს რეკომენდაცია შესრულებულად ჩაითვალოს.

TI ქართულ ოცნებას მიზნის მისაღწევად ჯერ კიდევ 2022 წლის იანვარში ლელო საქართველოსთვის დეპუტატის მიერ ინიცირებულ კანონპროექტსა და მასში არსებული იდეების გამოყენებას სთავაზობს.

• "კანონპროექტი ითვალისწინებს დამოუკიდებელი, მულტიფუნქციური და საგამოძიებო უფლებამოსილებით აღჭურვილი ეროვნული ანტიკორუფციული სააგენტოს შექმნას, რაც პირდაპირ და სრულად დააკმაყოფილებდა ევროკომისიის მე-4 რეკომენდაციას".

ორგანიზაცია ხელისუფლებას მოუწოდებს, არ გაუშვას ეს ისტორიული შესაძლებლობა ხელიდან და გააკეთოს ყველაფერი იმისათვის, რომ ყველაზე სკეპტიკურად განწყობილ მხარესაც კი არ დარჩეს კითხვები, შეასრულა თუ არა საქართველომ ევროკომისიის რომელიმე რეკომენდაცია.

• "2022 წლის ბოლომდე ჯერ კიდევ რჩება საკმარისი დრო იმისათვის, რომ სრულყოფილად დაკმაყოფილდეს საქართველოსთვის ევროკომისიის მიერ მიცემული რეკომენდაციები, რაც ქვეყანას ევროკავშირის წევრობის კანდიდატის სტატუსს მოუტანს და განამტკიცებს მის დემოკრატიულ მომავალს".