ჭყონდიდის მიტროპოლიტი პეტრე რუსთავი 2-თან საუბარში მის მიმართ გამოთქმულ ბრალდებებს პასუხობს და აცხადებს, რომ ესაა სიცრუე, რომელიც გაირკვევა.

"პატრიარქი ისევ დეზინფორმირებულია და თუ ეს ინფორმაცია მას ამ სახით აქვს, მაშინ ჩვენი ეკლესია ძალიან ცუდ დღეშია".

მიტროპოლიტი აცხადებს, რომ ის ადამიანები, რომლებმაც პატრიარქს, გერმანიაში ყოფნისას, ოპერაციის წინ, უთხრეს, რომ მის მოწამვლას აპირებდნენ, "ყველაფერზე წამსვლელები არიან" და მათ ხელმძღვანელად კვლავ შორენა თეთრუაშვილს ასახელებს.

"სანამ პატრიარქი ამ გარემოცვაშია, ჩვენ არ ვართ დაცულები მსგავსი ინტრიგებისგან და პროვოკაციებისგან და ცილისწამებისგან, რაც რა თქმა უნდა, პირველ რიგში, ემსახურება ეკლესიისა და პატრიარქის დისკრედიტაციას" - აცხადებს მიტროპოლიტი.

მიტროპოლიტი აცხადებს, რომ აუცილებელია ჩატარდეს დიდი საეკლესიო კრება.

დღეს საპატრიარქოს იურისტმა მიტროპოლიტი პეტრე პატრიარქის მოკვდინების სურვილში დაადანაშაულა.