გირჩი – მეტი თავისუფლება, დროა და სტრატეგია აღმაშენებელი ოპოზიციური ერთობის აუცილებლობაზე კიდევ ერთხელ საუბრობენ.

რატომ არის მნიშვნელოვანი: სამივე პარტიაში ამბობენ, რომ ქართული ოცნების დამარცხების ერთადერთი გზა არის დიდი ერთობა საქართველოს ევროპული მომავლის გარშემო.

  • აცხადებენ, რომ მზად არიან, შეხვდნენ სხვა პარტიებსაც და გაიზარდოს მათი ერთობა.

ზურაბ ჯაფარიძე: გირჩი — მეტი თავისუფლების ლიდერის თქმით, ქვეყანას აქვს არჩევანი გასაკეთებელი — ან მივდივართ დასავლეთისკენ და ევროპისკენ ან ვრჩებით რუსეთის გავლენის ქვეშ

  • "ამ მოცემულობაში მგონია, რომ ოპოზიციის გაერთიანება საერთო მიზნისკენ გახდეს ევროპული სივრცის ნაწილი, არის უკიდურესად მნიშვნელოვანი;
  • გაერთიანების გარეშე და კოორდინაციის და ერთობლივი მოქმედების გარეშე, ამ სისტემის და ამ მონსტრის დამარცხება ივანიშვილით სათავეში უკიდურესად რთულია", — ამბობს ჯაფარიძე მთავარ არხთან.

ელენე ხოშტარია: "მე, ზურას და გიორგის, სრული თანხმობა გვაქვს ამ ეტაპისთვის პოზიციებში და ერთად ვიმუშავებთ", — ამბობს დროას ლიდერი.

  • ხოშტარია მთავარ არხთან ამბობს, რომ იმუშავებენ სხვა პარტიებთან, რომ დავარწმუნოთ მათი "გზის სისწორეში".

გიორგი ვაშაძე: სტრატეგია აღმაშენებლის ლიდერის განცხადებით, ამ ეტაპისთვის მთავარი გზა არის ერთიანობა.

  • "მე იმედი მაქვს, რომ დროც არის ამისთვის და სხვებიც აბსოლუტურად ნახავენ რომ სხვა გზა და ალტერნატივა არ არსებობს".

რას ამბობენ სხვა პარტიები: ევროპული საქართველოს ლიდერი გიგა ბოკერია ამბობს, რომ ენმ-მ, ლელომ და სტრატეგია აღმაშენებელმა სიტყვის გატეხვით, პარლამენტში შესვლით ნდობა დააზიანეს, საჭიროა ამ ნდობის აღდგენა.

  • "ვთვლით, რომ ივანიშვილის რეჟიმის დასამარცხებლად საჭიროა ყველა პოლიტიკური ჯგუფის მიერ საკუთარი ამომრჩევლის, მომხრეების რაოდენობის ზრდა და მათი პოლიტიკური მოტივირება ამ ბრძოლაში მონაწილეობის მისაღებად, არჩევნების გზით, ხმების დაცვის გზით და მშვიდობიანი პროტესტის გზით", — ამბობს ბოკერია.
  • ენმ-ს ერთ-ერთი ლიდერი ხატია დეკანოიძე კი ამბობს, რომ ერთიანი იდეის გარშემო უნდა იყოს ფართო ფრონტი.