საქართველოს პრემიერ-მინისტრი, გიორგი კვირიკაშვილი გლობალური უსაფრთხოების ფორუმის ფარგლებში გამართულ სესიაზე რუსეთის საკითხსაც შეეხო და განაცხადა, რომ მეზობლები მტრებად არ უნდა აქციო. კვირიკაშვილის სიტყვით გამოსვლის შესახებ ინფორმაცია მთავრობის ადმინისტრაციის ვებგვერდზე გამოქვეყნდა.

"სტაბილური და დემოკრატიული მეზობლების გარემოცვაში ყოფნა ყველა ჩვენგანის ინტერესებში შედის. მეორე მხრივ, ეს პარტნიორობა უნდა ეფუძნებოდეს ტერიტორიული მთლიანობისა და სუვერენიტეტის, ასევე სხვა სახელმწიფოებისა და მეზობლების სუვერენული გადაწყვეტილების პატივისცემის ძირეულ პრინციპებს," - აღნიშნა გიორგი კვირიკაშვილმა.

პრემიერ-მინისტრის თქმით, საქართველო აღარ არის „პოსტ"- ქვეყანა. მან აღნიშნა, რომ საქართველოს შეიძლება აღმოსავლეთევროპის ქვეყანა ეწოდოს, ქვეყანაში არის ერთ-ერთი ყველაზე დაბალი კორუფციული მაჩვენებელი და უსწრებს ბევრ ევროპულ ქვეყანასაც.

"ჩვენ ზედმიწევნით მივყვებით ჩვენს ასოცირების დღის წესრიგს და მის სამოქმედო გეგმას. ასე რომ, საქართველოს ევროპული მისწრაფებებისა და ნატოსკენ სწრაფვის წინააღმდეგ გამოსვლა სრულიად ალოგიკურია, რადგანაც ჩვენი მოსახლეობის 75 პროცენტზე მეტი მხარს უჭერს ნატოში ინტეგრაციას, ხოლო ევროინტეგრაციას მხარს უჭერს 80 პროცენტზე მეტი.ჩვენ ვემხრობით ღირებულებებზე დაფუძნებულ ინტეგრაციას. ჩვენ გვჯერა, რომ ეს მიზნები მიღწეული იქნება თანმიმდევრული და მიზანმიმართული შრომის შედეგად," - აღნიშნა პრემიერ მინისტრმა.

აღმოსავლეთ პარტნიორობის ქვეყნებში უსაფრთხოების პრობლემისადმი მიძღვნილი სესია "აღმოსავლეთ სამეზობლო 2017" გლობალური უსაფრთხოების ფორუმის ფარგლებში გაიმართა.