ყველა ჩვენგანს გამოუვლია წლები, როდესაც ცარცით თეთრად შეღებილი ანდაც მელნით ლურჯად მოთხუპნული თითებით შემოგვივლია იმ შენობის გრძელი დერეფნები, რომელსაც ხან საპყრობილედ, ხან კი სახლად მივიჩნევდით; საკლასო ოთახის კედელზე ჩამოკიდებული უზარმაცესი საათისთვისაც გვიხვეწნია, ცოტა აჩქარებულიყო, მასწავლებელზე ანდა კლასელებზე გულმოსულს ფანჯარაში ცქერა და ჰორიზონტის დაჟინებით თვალიერებაც დაგვიწყია, ანდაც ჭორაობის ხასიათზე მოსულს, გაკვეთილის დროს მეგობრებთან წერილების გაცვლაც გვითავია.

შესაძლოა, სწორედ ახლა გადიხარ ამ გზას და დაუსრულებელიც გეჩვენება, მაგრამ იცოდე, ერთ დღესაც აუცილებლად დამთავრდება და შენც აუცილებლად მოიგონებ იმ ფრაზებს, რომლებიც იყო დრო, ყოველდღიურად გესმოდა და საკუთარი სახელი და გვარივით გაზეპირებული გქონდა.

მაშ ასე, მასწავლებლების 10 საყვარელი ფრაზა, რომელზეც ალბათ ყველა მოსწავლეს ჩაეღიმება:

1. დაფასთან ვინ მოვა?!

ეს ფრაზა "გამობრძანდი დაფასთან" ფრაზის ბიძაშვილია. ცოტა მეტად კეთილგანწყობილი, ცოტა მეტი არჩევანის მომცველი, თუმცა მაინც ყველა მოსწავლისთვის ავისმომასწავლებელი. ამ დროს გადარჩენის შემუშავებული ტაქტიკა — ა) ვთამაშობთ, ვითომ ჩანთაში რაღაც სასიცოცხლოდ აუცილებელს ვეძებთ და კითხვა ვერ გავიგეთ, ბ) ვთამაშობთ, ვითომ ძალიან დაგვაინტერესა რომელიღაც გვერდმა სახელმძღვანელოში და ერთი სული გვაქვს, ბოლომდე ჩავიკითხოთ.

2. კარნახი არ გავიგო!

ერთმანეთის მოსისხლე მტრებად ქცეულმა კლასელებმაც კი იციან, რომ დაფასთან გასვლის დროს ყველა ბრძოლა ჩერდება და დროებითი ზავის პირობებში ჰაერში მშვიდობის მტრედები დაფრინავენ სასიცოცხლოდ მნიშვნელოვანი შეტყობინებებით. მასწავლებლებს კი რატომღაც ეს შეტყობინებები არაფრად ეპიტნავებათ და, ან თქვენი ხმა არ გავიგო, ან თუ ასეთი ჭკვიანები ხართ, თქვენ გამოდით დაფასთანო, მტრულად გთავაზობენ.

3. ნიშნები კარგად გინდათ თქვენ და თქვენს მშობლებს!...

აქ ალბათ თქვენ ან თქვენმა მშობლებმა რომელიღაც კრებაზე უნებლიეთ გაანაწყენეთ და ფიქრობს, დროა, შეგახსენოთ, ვის ხელთაა აქ ძალაუფლება!

4. მასე დედათქვენებს ეტლიკინეთ!

აქ რაღაცაზე იმდენად განარისხეთ, რომ მხოლოდ თქვენი გამოლანძღვა აღარ კმარა, დედებსაც უნდა გადაწვდეს და თუ საჭირო გახდა, ყვავი ჩხიკვის მამიდამდეც მივა!

5. სიწყნარე! ბუზის გაფრენის ხმა გავიგო!

ნეტავ, თუ იციან ბუზებმა როგორ უყვართ მათი ხმა მასწავლებლებს?! ან საერთოდაც, რა ესაქმება სკოლაში ბუზს, მაგრამ, რა თქმა უნდა, მანდ ყველა და ყველაფერი მისაღებია, მხოლოდ თქვენ ხართ კრიტიკის საგანი!

6. ყველა რომ ხიდიდან გადახტეს, თქვენც უნდა გადახტეთ?!

არ გაბედოთ და არ უთხრათ, რომ სიტუაციას გააჩნია. თვალები დამნაშავესავით დახარეთ და თუ შეწუხებულ სახეს ვერ იღებთ, ან არც ისე დამაჯერებელს, ფარულად ფეხზე იჩქმიტეთ და, სავარაუდოდ, ყველაფერი მოგვარდება.

7. სად გაიზარდეთ?!

აქაც რაღაცაზე იმდენად განარისხეთ, სხვა ახსნას ვერ პოულობს — ალბათ ბნელი სულები გზრდიდნენ და თქვენ უკეთესი როგორ იქნებოდით!

8. ნიჭიერია, მაგრამ ზარმაცი...

აქ ალბათ თქვენი რომელიმე ჩურჩუტელა კლასელის დედაა სკოლაში მობრძანებული და თქვენი ძვირფასი მასწავლებლები რატომღაც მაინცდამაინც ახლა მორცხვობენ და ერიდებიან სიმართლეს.

9. მასწავლებელი - ზოგჯერ უშვილო, მაგრამ ათასი ბავშვის მშობელია

აქ ან თქვენ შეაქეთ ან თქვენმა მშობელმა და მზადაა, გულში ჩაგიკრათ და აღარ გაგიშვათ, სანამ ისევ ნერვებს არ მოუშლით თქვენ და თქვენი მშობლები!

10. ვნახავთ, ბოლოს ვინ გაიცინებს!

ყველა მოსწავლემ იცის, როცა ომს უცხადებენ და, თუ არ იცის, შეუძლია, ეს ფრაზა მის დასაწყისად ჩათვალოს. აბა, თქვენ იცით!