ბიზნესმენ უჩა მამაცაშვილის ადვოკატის, ამირან გიგუაშვილის განცხადება ინტერპრესნიუსსა და რადიო თავისუფლებას აქვთ გამოქვეყნებული.

რატომ არის მნიშვნელოვანი: უკრაინამ ყოფილი პრემიერმინისტრის და ქართული ოცნების დამფუძნებლის, ბიძინა ივანიშვილის ნათესავებსა და გარემოცვას დაუწესა სანქციები.

  • სანქცირებულთა სიაში არიან ქართული ოცნების დამფუძნებლის ძმა ალექსანდრე ივანიშვილი და ალექსანდრეს ცოლი ქეთევან ხარაზიშვილი.
  • ასევე, ბიძინა ივანიშვილის დეიდაშვილი, უჩა მამაცაშვილი და მისი შვილი, ტიტე მამაცაშვილი.

მამაცაშვილის ადვოკატი უკრაინის ხელისუფლების გადაწყვეტილებას პოლიტიკურ სპეკულაციას უწოდებს.

  • "უკრაინის უმაღლესი ხელისუფლების აღნიშნული გადაწყვეტილება თავისთავად მოკლებულია ყოველგვარ ფაქტობრივ და სამართლებრივ არგუმენტაციას".
  • ადვოკატის განცხადებით, არ არსებობს არანაირი მტკიცებულება იმისა, რომ მამაცაშვილი ან მისი ოჯახის რომელიმე წევრი, რაიმე ფორმით შესაძლოა დაკავშირებული იყვნენ საქმიანობასთან, რაც საფუძველი გახდებოდა მათ მიმართ მსგავსი გადაწყვეტილების მიღებისას.

რა სანქციები დაუწესდათ: თითოეულ პირს ახლავს მოკლე დახასიათება და მისთვის დაწესებული შეზღუდვების სია, რომლებშიც აღნიშნულია, რომ დაებლოკებათ აქტივები და დროებით წაერთმევათ მათ საკუთრებაში არსებული აქტივების გამოყენებისა და განკარგვის უფლება.

  • ასევე საქნციებში შედის უკრაინის ტერიტორიაზე რესურსების ტრანზიტის, ფრენების და ტრანსპორტირების შეზღუდვა, ნაწილობრივი ან სრული შეწყვეტა;
  • ეკონომიკური და ფინანსური ვალდებულებების შესრულების შეჩერება;
    ლიცენზიებისა და სხვა ნებართვების გაუქმება ან შეჩერება.