ამის შესახებ ქართული ოცნების წევრებმა ისაუბრეს. ისინი რეზოლუციაში შეტანილ ცვლილებებს "ნაუცბადევად შეპარულს" უწოდებენ და პარტიულ ინტერესებს ხედავენ.

რატომ არის მნიშვნელოვანი: 13 ოქტომბერს ევროპის საბჭოს საპარლამენტო ასამბლეამ ახალ რეზოლუციაში რუსეთი ტერორისტულ რეჟიმად ცნო.

• დოკუმენტში წერია, რომ რუსეთის აგრესია ცალსახად უნდა დაიგმოს, როგორც დანაშაული, საერთაშორისო სამართლის დარღვევა და მსოფლიო უსაფრთხოებისთვის საფრთხე.
• აღნიშნულია ისიც, რომ უნდა გადაიხედოს სხვა ქვეყნების პოლიტიკური პატიმრების საქმეები, მათ შორის, ნახსენები ჰყავთ მიხეილ სააკაშვილი, რომელსაც პოლიტპატიმრად მოიხსენიებენ.

დეტალები: მმართველი გუნდის დეპუტატი არჩილ თალაკვაძე ამტკიცებს, რომ "სინამდვილეში მხარი დაუჭირეს რეზოლუციას", რომელიც რუსეთთან დაკავშირებით იყო ინიცირებული და უკრაინის მხარდაჭერას ითვალისწინებდა, მაგრამ ცვლილებებს არა.

• "ეს რეზოლუცია იყო ინიცირებული ევროპის საბჭოს საპარლამენტო ასამბლეის პოლიტიკური კომიტეტის სხდომაზე, პირადად მე გახლავართ ამ კომიტეტის წევრი და შემიძლია მოკლედ გითხრათ, რომ უმრავლესობის სახელით მხარი დავუჭირე რეზოლუციის თავდაპირველ, ორიგინალ ვერსიას", — განაცხადა თალაკვაძემ.
• მისი თქმით, ამის შემდეგ რეზოლუციის განხილვამ პლენარულ სხდომაზე გადაინაცვლა და "სააკაშვილთან სუბიექტურად დაკავშირებულმა პირებმა" დააინიცირეს ცვლილება, რაზეც გივი მიქანაძემ განაცხადა, რომ მხარს არ დაუჭირდნენ.
• "სინამდვილეში ჩვენ მხარი არ დავუჭირეთ ცვლილებას, სადაც ჩაწერილი იყო სააკაშვილის მეგობრების მიერ ინიცირებული ცვლილება, თითქოს სააკაშვილს საქართველოში დევნის რუსეთი", — ასე ამართლებს პარტის საქციელს თალაკვაძე.
• "ჩვენი დელეგაციის წარმომადგენლები ერთ-ერთი თანაავტორები იყვნენ ამ რეზოლუციიის, ამიტომ ამ რეზოლუციას ექნებოდა საქართველოს მხარდაჭერა, რომ არა ასე ვთქვათ, არ ვიცი რა სიტყვა ვიხმარო, რომ არა ნაუცბადევი შეპარება ამ რამდენიმე წინადადების", — განაცადა ნიკოლოზ სამხარაძემ.

ოპოზიცია: პარტია მოქალაქეების ლიდერი, ლევან იოსელიანი აცხადებს, რომ რეზოლუციას მხარი დაუჭირა, თუმცა არა მეოთხე შესწორებას, სადაც სააკაშვილი პოლიტიკურ პატიმრადაა მოხსენიებული.

• მისივე თქმით, კენჭის ყრის დღეს ხმა, ტექნიკურად არ დაფიქსირდა, რის გამოც მეორე დღეს სესიაზე განაცხადა, რომ ჩაესწორებინათ.
• სტრატეგია აღმაშენებლის წევრი, პაატა მანჯგალაძეც ამბობს, რომ რეგლამენტი იძლეოდა საშუალებას, მხარი დაეჭირათ ძირითადი ტექსტისთვის და არა დამატებისთვის, ამიტომ მმართველი გუნდის განმარტებები ტყუილია.
• ლელოს განცხადებით, შემაშფოთებელი და ტრაგიკულია, რომ საქართველოს მართავს "რევანშისტ და უგუნურ ადამიანთა გუნდი", ვინც დასაშვებად მიიჩნევს ქვეყნის შიდა პოლიტიკა საერთაშორისო ასპარეზზე გადაიტანოს და შიდა პარტიულ-პოლიტიკური დინამიკა სახელმწიფოს საგარეო გადაწყვეტილებებზე ასახოს.