მას შემდეგ რაც რუსეთმა უკრაინის 4 რეგიონის ანექსია გამოაცხადა, კრემლის პრესსპიკერი ვერ ხსნის რა საზღვრებში მოახდინა ეს.

რატომ არის მნიშვნელოვანი: 30 სექტემბერს ვლადიმერ პუტინმა უკრაინის ოკუპირებული რეგიონების, ლუგანსკის, ზაპოროჟიესა, ხერსონსა და დონეცკის ანექსია გააფორმა. პუტინმა იკადრა და ამ ცერემონიიდანაც მოუწოდა უკრაინას დაუყოვნებლივ შეწყვიტოს ცეცხლი და დაბრუნდეს მოლაპარაკების მაგიდასთან;

  • უკრაინამ კი თქვა, რომ პუტინი ცდილობს ტერიტორიების ხელში ჩაგდებას, რომელსაც ადგილზე ფიზიკურად არც კი აკონტროლებს.
  • საერთაშორისო საზოგადოებამ დაგმო რუსეთის ქმედება და ე.წ რეფერენდუმები არ აღიარა.

დეტალები: კითხვა პუტინის პრესსპიკერს დიმიტრი პესკოვს დაუსვეს. მან კი უპასუხა, რომ მოსკოვი კონსულტაციებს გააგრძელებს რეგიონების მოსახლეობასთან, რა საზღვრებით "შევიდნენ" ისინი რუსეთის ფედერაციაში.

  • პესკოვმა დაზუსტებით ვერ უპასუხა კითხვას, თუ როგორ მოხდება მოსახლეობასთან კონსულტაციები და ისევ იმეორებს, რომ მოსახლეობის ინტერესებს ითვალისწინებენ.
  • რაც შეეხება ლუგანსკსა და დონეცსკს, ის ამტკიცებს, რომ იმ საზღვრებით "მიიერთეს", რისი ოკუპაციაც 2014 წელს მოახდინა კრემლმა.

გარდა ამისა, შეკითხვაზე, კრემლის აზრით, არის თუ არა რუსეთის ნაწილი ხერსონისა და ზაპოროჟიეს ოლქების ის ტერიტორიები, რომლებსაც უკრაინა აკონტროლებს, პესკოვმა თქვა:

  • "მე ახლა ვერაფერს დავამატებ" და გაიმეორა რომ განაგრძობენ საუბარს, ხალხთან, რომლებიც იქ ცხოვრობენ.

ამის ფონზე უკრაინა განაგრძობს კონტრშეტევას და იბრუნებს ტერიტორიებს.

  • გუშინ ცნობილი გახდა, რომ უკრაინამ ხერსონში კიდევ ორი დასახლებული პუნქტი გაათავისუფლა ხერსონში — არხანგელკსი და მიროლიუბივკა.
  • სწორედ ანექსიის გამოცხადების შემდეგ გაათავისუფლა უკრაინამ ლიმანიც და იქ უკრაინული დროშა დააბრუნა.