საგარეო ურთიერთობათა კომიტეტის თავმჯდომარემ, ნიკოლოზ სამხარაძემ CNN-თან თქვა, რომ საზღვრის საკითხი "მორალურ დილემას წარმოადგენს".

რატომ არის მნიშვნელოვანი: 21 სექტემბერს პუტინმა რუსეთში ნაწილობრივი მობილიზაცია გამოაცხადა — მას შემდეგ რუსეთის მოქალაქეები ქვეყნის დატოვებას ცდილობენ, საზღვრებთან და აეროპორტებში რამდენიმესაათიანი რიგებია.

  • ნაწილი საქართველოში გამოქცევას ცდილობს — ლარსის გამშვები პუნქტთან რამდენიმე დღეა დაახლოებით 13-15-კილომეტრიანი საცობებია;
  • ვახტანგ გომელაური ამბობს, რომ მობილიზაციის გამოცხადების შემდეგ გადმომსვლელთა მაჩვენებელმა, წინა დღეებთან შედარებით 40-45%-ით მოიმატა.

სამხარაძის თქმით, გასული კვირის განმავლობაში 60 000-ზე მეტი რუსეთის მოქალაქე შემოვიდა ქვეყანაში და აღნიშნა, რომ მათგან მინიმუმ 40% ეთნიკური ქართველია, რომლებსაც რუსეთის მოქალაქეობა ჰქონდათ.

  • "ჩვენ არ შეგვიძლია საზღვრის ჩაკეტვა, რადგან ეს პუტინისთვის სასარგებლო იქნება, რადგან მას სურს ამ ხალხის მობილიზაცია და უკრაინაში საბრძოლველად გაგზავნა";
  • აღნიშნა ისიც, რომ ეს მძიმე ტვირთი იქნება ქვეყნის სოციალური სტრუქტურისთვის და ასევე ქვეყნის ბიუჯეტისთვის;
  • როგორც სამხარაძე ამბობს, საქართველოს, შესაძლოა, გადახედოს ჰუმანიტარულ ნიადაგზე რუსეთის მოქალაქეების მიღების პოლიტიკას, თუ ადამიანების რაოდენობა მკვეთრად გაიზრდება;
  • CNN-თან თქვა ისიც, რომ მისი ქვეყანაში ამ დროისთვის ბევრი იძულებით გადაადგილებული ადამიანია, საქართველოს ოკუპირებული ტერიტორიებიდან და ასევე უკრაინიდან და ბელარუსიიდან.

რიცხვებში: შსს-მ 27 სექტემბერს გამოაქვეყნა მონაცემები. მობილიზაციის ამოქმედებამდე, საქართველოს საზღვარი ყველა გამშვები პუნქტიდან გადმოკვეთა და გადაკვეთა:

  • 17 სექტემბერს: 6 986 — 7 406;
  • 18 სექტემბერს: 6 606 — 6 743;
  • 19 სექტემბერს: 6 411 — 6 782;
  • 20 სექტემბერს: 5 603 — 6 199 პირმა.

მობილიზაციის გამოცხადების შემდეგ, მონაცემები გაზრდილია. მაგალითად, 21 სექტემბერს რუსეთიდან საზღვარი გადმოკვეთა 6 402-მა და გადაკვეთა 6 011-მა პირმა. დანარჩენ დღეებში შემოსულთა და გასულთა სტატისტიკა ასეთია:

  • 22 სექტემბერს: 6 150 — 6 050;
  • 23 სექტემბერს: 9 307 — 6 214;
  • 24სექტემბერს: 9 330 — 6 249;
  • 25 სექტემბერს: 11 143 — 5 519;
  • 26 სექტემბერს: 10 804 — 4 947.