NATO-ს განცხადებით, დონეცკის, ლუგანსკის, ზაპოროჟიესა და ხერსონის ოლქებში რუსეთს რეფერენდუმის ჩატარებას ლეგიტიმაცია არ აქვს და ეს გაეროს წესდების აშკარა დარღვევაა.

რატომ არის მნიშვნელოვანი: მას შემდეგ რაც პუტინმა რუსეთში სამხედრო მობილიზაცია გამოაცხადა, ისაუბრა "რეფერენდუმზეც, რომელიც მათ მიერ ოკუპირებულ ტერიტორიებზე არის დაგეგმილი.

  • "რეფერენდუმი" უკვე რამდენჯერმე გადაიდო, მაშინ ოფიციალური მიზეზი არ იყო ცნობილი, თუმცა Meduza-ს წყაროებმა უკრაინის წარმატებული კონტრშეტევა დაუსახელეს.
  • ომის შემსწავლელმა ინსტიტუტმა ბოლო ანგარიშში განაცხადა, რომ უკრაინის კონტრშეტევა კრემლს პანიკაში აგდებს — მათი თქმით, დონეცკისა და ლუგანსკის ე.წ. სახალხო რესპუბლიკების მარიონეტული ორგანოები მათ ხელმძღვანელობას მოუწოდებენ, რომ რეგიონებში სასწრაფოდ ჩაატარონ ე.წ. რეფერენდუმები.

დეტალები: განცხადებაში ნათქვამია, რომ NATO-ს სახელმწიფოები არ აღიარებენ უკრაინის ტერიტორიების არალეგალურ და უკანონო ანექსიას.

  • "ეს მიწები უკრაინისაა".
  • რაც შეეხება სამხედრო მობილიზაციას, ამბობენ, რომ ეს რუსეთის მიერ უკრაინაში დაწყებული უკანონო ომის შემდგომი ესკალაციის მცდელობაა.

ამასთან, მათი თქმით, უკრაინელი ხალხის უზარმაზარ ტანჯვასა და ომის ფასზე, მათ შორის რუსი ხალხისთვისაც, რომელთა მობილიზებაც ახლა ხდება, სრული პასუხისმგებლობა რუსეთს ეკისრება.

  • აღნიშნავენ, რომ ამ კონფლიქტის დასრულებაც რუსეთის ხელშია.
  • "ჩვენ ვადასტურებთ ჩვენს ურყევ მხარდაჭერას უკრაინის დამოუკიდებლობის, სუვერენიტეტისა და ტერიტორიული მთლიანობისადმი მის საერთაშორისოდ აღიარებულ საზღვრებში და უკრაინის თანდაყოლილი უფლების დაცვაზე".
  • "ვრჩებით ერთიანები მოკავშირეთა ტერიტორიის ყოველი ინჩის დასაცავად".