ბალტიის ქვეყნები და პოლონეთი 19 სექტემბრიდან აწესებენ შესვლის მკაცრ შეზღუდვებს შენგენის ტურისტული ვიზების მქონე რუსეთის მოქალაქეებისთვისაც, მიუხედავად იმისა, თუ რომელ ქვეყანაში გაიცა ისინი.

რატომ არის მნიშვნელოვანი: ომის დაწყების შემდეგ, ევროკავშირის ქვეყნებსა და რუსეთს შორის პირდაპირი საჰაერო მიმოსვლა გაუქმდა. სახმელეთო საზღვარი კი მათთვის ერთ-ერთი ალტერნატივაა.

• ოფიციალური კიევი მოუწოდებს დასავლეთს რუსეთის მოქალაქეებს ევროპაში შესვლა აუკრძალონ. ბალტიის ქვეყნებმა აქამდე უკვე დააწესეს გარკვეული შეზღუდვები რუსეთის მოქალაქეებისთვის.

დეტალები: ოთხივე ქვეყანა საერთო განცხადებაში აღნიშნავს, რომ რუსეთის მოსაზღვრე სახელმწიფოები სულ უფრო მეტად შეშფოთებულნი არიან რუსეთის მოქალაქეების მნიშვნელოვანი და მზარდი შემოდინებით ევროკავშირსა და შენგენის ზონაში მათი საზღვრების გავლით.

• მათი თქმით, რუსეთის მოქალაქეების შესვლა ხდება სერიოზული საფრთხე საზოგადოებრივი უსაფრთხოებისთვის და საერთო შენგენის ზონისთვის.
• "რუსეთის მოქალაქეებს შორის, რომლებიც შედიან ევროკავშირის/შენგენის ზონაში, არიან ადამიანები, რომლებიც მოდიან ჩვენი ქვეყნების უსაფრთხოების შელახვის მიზნით, რამდენადაც რუსეთის მოქალაქეების სამი მეოთხედი მხარს უჭერს რუსეთის აგრესიულ ომს უკრაინაში".
• "მიუღებელია, რომ აგრესორი სახელმწიფოს მოქალაქეებს შეუძლიათ თავისუფლად იმოგზაურონ ევროკავშირში, მაშინ, როცა, უკრაინაში ადამიანებს აწამებენ და კლავენ".
• ქვეყნები ხაზს უსვამენ, რომ ევროკავშირში მოგზაურობა არის პრივილეგია და არა ადამიანის უფლება.

გარდა ამისა, ისინი მივესალმებით გადაწყვეტილებას რუსეთთან ევროკავშირის სავიზო რეჟიმის გამარტივების შესახებ შეთანხმების შეჩერების შესახებ.

• თუმცა აცხადებენ, რომ ამის გარდა საჭიროა, შემდგომი ზომები, როგორც გაცემული ვიზების რაოდენობის მკვეთრად შეზღუდვისთვის (პირველ რიგში ტურისტული ვიზების), ასევე რუსეთის მოქალაქეების ნაკადის შესამცირებლად ევროკავშირსა და შენგენის ზონაში.
• "ესტონეთი, ლატვია, ლიეტუვა და პოლონეთი შეთანხმდნენ საერთო რეგიონულ მიდგომაზე და ამით გამოხატავენ თავიანთ პოლიტიკურ ნებას და მტკიცე განზრახვას, შემოიღონ ეროვნული დროებითი ზომები ევროკავშირის ვიზების მქონე რუსეთის მოქალაქეებისთვის".

გამონაკლისები: ქვეყნები აცხადებენ, რომ აკრძალვა არ შეეხება ჰუმანიტარული საჭიროების მქონე პირებს, ბინადრობის ნებართვის მფლობელებს, სატვირთო და სატრანსპორტო სერვისების მძღოლებს. ასევე მათ, ვინც ოჯახის წევრთან შესახვედრად კვეთს საზღვარს.

• შეზღუდვები არ შეეხება დიპლომატიური მისიებსა და კალინინგრადის ხელშემწყობი პირების ტრანზიტისთვის.
• "ჩვენ სრულად ვუჭერთ მხარს პუტინის რეჟიმის ოპონენტების მხარდაჭერის გაგრძელების აუცილებლობას და მაშ შესაძლებლობა უნდა მივცეთ რუსეთი დატოვონ".

კაია კალასის განცხადებით, ევროკავშირის სანქციების გათვალისწინებით, რომელიც კრძალავს საჰაერო მიმოსვლას, ესტონეთის აღმოსავლეთი საზღვარი სატრანზიტო კვანძად იქცა.

• ესტონეთის პრემიერმინისტრი ამბობს, რომ თუ თებერვალში 10 477-მა რუსეთის მოქალაქემ გადმოკვეთა საზღვარი, ეს რიცხვი ივლისში 26 500-მდე გაიზარდა, ხოლო ზაფხულის თვეებში დღეში საშუალოდ 1 000-ზე მეტი ადამიანი კვეთდა საზღვარს.
• "გარდა საკუთარი შიდა უსაფრთხოებისა, ესტონეთი, როგორც გარე საზღვრის სახელმწიფო, პასუხისმგებელია შენგენის მთელ ზონაზე და რუსეთის მოქალაქეების მასობრივი მგზავრობა იწვევს უსაფრთხოების გაზრდილ საფრთხეს არსებულ ვითარებაში".
• "ევროკავშირში მოგზაურობა არის პრივილეგია და არა ადამიანის უფლება", — ამბობს კალასი.
• იგივეს წერს ლიეტუვა თავის ოფიციალურ გვერდზე.