ამერიკის შეერთებული შტატების ელჩი იან კელი მიიჩნევს, რომ წინასაარჩევნო პროცესში როგორც აშშ-ში იქნებოდა მიუღებელი ტელევიზიაში მენეჯმენტისა და მფლობელების მსგავსი ფორმით შეცვლა, ეს ასეთივე მიუღებელი უნდა იყოს საქართველოშიც. აღნიშნული განცხადება იან კელიმ რუსთავი 2-ის გარშემო მიმდინარე მოვლენების კომენტირებისას თბილისში, ქართულ-ამერიკულ უნივერსიტეტში სტუმრობისას გააკეთა:

"ამასთან დაკავშირებით ორ ზოგად კომენტარს გავაკეთებდი. ერთი ნაწილი შეეხება თვითონ მიმდინარე პროცესს და მეორე თვითონ იმ მაღალ ინტერესს, რომელიც ამ პროცესშია. პირველ რიგში, ვიტყოდი რომ ნებისმიერი სასამართლოს ნებისმიერი კანონის უზენაესობის ძირითადი ქვაკუთხედი არის სასამართლოს დამოკიდებლობა და სასამართლო არის ქვაკუთხედი მთელი ამ სისტემისა. ამიტომ ნებისმიერმა საქციელმა, რომელმაც შეიძლება შეურაცხყოფა მიაყენოს სასამართლოს როგორც ინსტიტუციას, ან სასამართლოს ნებისმიერ წარმომადგენელს, მიუღებელი იქნებოდა აშშ ში და მიუღებელია საქართველოშიც".

ელჩის თქმით, ის მიმდინარე სასამართლო პროცესზე დამატებით შეფასებას ვერ გააკეთებს, თუმცა აღნიშნავს:

"სასამართლო პროცესი ნებისმიერი მედია ორგანიზაციასთან დაკავშირებული და განსაკუთრებით თუ ეს მედია ორგანიზაცია წამყვანი, ასე ვთქვათ, ოპოზიციურად განწყობილი მედია ორგანიზაციაა ხელისუფლების მიმართ, ნებისმიერი სასამართლო პროცესი საარჩევნო პროცესში რომ ყოფილიყო და ჩვენ საარჩევნო წელში ვართ, როგორ ამერიკაში, ისე საქართველოში, ამას ახლა გადავიტანდი აშშ-ს კონტექსტში. ასეთი რამ რომ ხდებოდეს ახლა იქ, რომ ნებისმიერი ტელევიზიის წინააღმდეგ მიდიოდეს სასამართლო პროცესი და საშიშროება შეიქმნას მფლობელების და მენეჯმენტის, ეს აბსოლუტურად მიუღებელი იქნებოდა როგორც მედიისთვის, სამოქალაქო საზოგადოების წარმომადგენლებისთვის, ასევე ხელისუფლების სამივე შტოსთვის. ამიტომ ვიტყვი, ეს მიუღებელია, ამის მიმართ ტოლერანტულობა არ იქნებოდა გამოხატული აშშ-ში, ისევ ვიმეორებ, საარჩევნო პერიოდში და არ უნდა იყოს ამის მიმართ მოთმენა არც საქართველოში".

რუსთავი 2-ის გენერალურმა დირექტორმა, ნიკა გვარამიამ 2 ივნისს საგანგებო ბრიფინგზე განაცხადა, რომ რამდენიმე საათის წინ ტელეკომპანიისთვის კონფიდენციალური წყაროსგან ცნობილი გახდა რუსთავი 2-ის საქმის ერთ-ერთი მოსამართლის, ნათია გუჯაბიძის უკანონო ქმედების შესახებ. მთავარი პროკურატურა კი სწორედ ამ ბერკეტის გამოყენებით ახდენს მოსამართლეზე ზეწოლას.