უკრაინის პრეზიდენტის ადმინისტრაციის უფროსის მრჩეველი მიხაილო პოდოლიაკი ბელარუსის პრეზიდენტის მილოცვას Twitter-ზე გამოეხმაურა.

რატომ არის მნიშვნელოვანი: დღეს ლუკაშენკოს არ შერცხვა და უკრაინას დამოუკიდებლობის დღე მიულოცა.

  • ოფიციალურად ბელარუსის ჯარები ომში ჩართული არ არის, თუმცა უკრაინა აცხადებს, რომ მათ ტერიტორიას რუსეთი უკრაინული დასახლებების დასაბომბად იყენებს.
  • უკრაინაში რუსეთის შეჭრის შემდეგ ბელარუსს არაერთმა ქვეყანამ დაუწესა სანქციები ომის მხარდაჭერისთვის.
  • უკრაინული მედიები ლუკაშენკოს მილოცვის აბსურდულობაზე მიუთითებენ და აღნიშნავენ, რომ ის თანააგრესორია.

პოდოლიაკის თქმით, ლუკაშენკოს ნამდვილად სჯერა, რომ მსოფლიო ვერ ამჩნევს მის მონაწილეობას უკრაინის წინააღმდეგ დანაშაულებში.

  • ის წერს, რომ ბელარუსის პრეზიდენტი ცინიკურად უსურვებს უკრაინას "მშვიდობიან ცას".
  • "ეს სისხლით გაჟღენთილი კლოუნადა ჩაწერილია და შედეგები ექნება ბარბაროსული რუსული იმპერიის დაცემისთანავე".

რა თქვა ლუკაშენკომ: მილოცვაში ბელარუსის პრეზიდენტმა აღნიშნა, რომ "დარწმუნებულია, დღევანდელი წინააღმდეგობები ორი ქვეყნის ხალხს შორის გულწრფელი კეთილმეზობლური ურთიერთობების მრავალსაუკუნოვან საფუძველს არ დაანგრევს".

  • ლუკაშენკომ უკრაინელებს მშვიდობიანი ცა, შემწყნარებლობა, გამბედაობა, ძალა და წარმატებები უსურვა ღირსეული ცხოვრების აღდგენაში.