ევროსასამართლოს მოსამართლის, ნონა წოწორიას ძმა, ოთარ წოწორია ამბობს, რომ თავისივე სახლიდან ამოღებული სანადირო თოფები მისი საკუთრებაა, სხვა ნივთები - არა. ოთარ წოწორია სახლის ჩხრეკას, დის საქმიანობას უკავშირებს და მომხდარს "ანგარიშსწორებას" უწოდებს:

"ჩემი დის საწინააღმდეგოდაა გაკეთებული ყველაფერი და ალბათ ანგარიშსწორებაა. ჩემი და იყო ადეიშვილის მოადგილე და ალბათ ამიტომ. სანადირო თოფები ნამდვილად ჩემია, რაც არის რეგისტრირებული, არც არასდროს მისვრია ეს თოფი და მაქვს შენახული, როგორც სახსოვარი. დანარჩენი ნაპოვნი ნივთები წარმოუდგენელია ჩემთვის, თუ როგორ გაჩნდა".

შინაგან საქმეთა სამინისტროს წარმომადგენლებმა ნონო წოწორიას ძმის სახლი გუშინ, 18 მაისს გაჩხრიკეს. უწყების ცნობით, ევროსასამართლოს მოსამართლის ძმის სახლიდან პისტოლეტი და ვაზნები ამოიღეს:

"ბინის ჩხრეკა ადვოკატის თანდასწრებით, ოპერატიული ინფორმაციის საფუძველზე ჩატარდა. ამოღებულია პისტოლეტი და სხვადასხვა კალიბრის ვაზნები. დაინიშნება შესაბამისი ექსპერტიზები."

ევროპული საქართველოს წევრი, ოთო კახიძის მიიჩნევს, ვანო მერაბიშვილისა და გიგი უგულავას საქმის განხილვაში მონაწილე წოწორიას ძმის სახლის ჩხრეკა სერიოზულ ეჭვს ბადებს.