უკრაინული მედიის ცნობით, ყირიმის სხვადასხვა ქალაქში აფეთქებები იყო, რუსი ოკუპანტები კი ამბობენ, რომ საჰაერო თავდაცვის სისტემები გააქტიურებულია.

რატომ არის მნიშვნელოვანი: უკვე რამდენიმე დღეა ოკუპირებულ ყირიმში აფეთქებებია.

• მხოლოდ 16 აგვისტოს სამხედრო ბაზებზე ორი აფეთქება მოხდა.
• რამდენიმე დღით ადრე კი აფეთქება იყო ყირიმის ერთ-ერთ სამხედრო ავიადრომზე, რის შედეგადაც 9 თვითმფრინავი განადგურდა.

ოფიციალურად უკრაინას არცერთ ინდიდენტში თავისი მონაწილეობა არ დაუდასტურებია, თუმცა ირიბად ამისკენ მიანიშნეს.

• თავის მხრივ რუსეთი ცდილობს ეს არა უკრაინის შეტევად, არამედ უბედურ შემთხვევად წარმოაჩინოს.
• მაგალიათად: როგორც კრემლისტური მედია რია აცხადებს, რუსეთის თავდაცვის სამინისტრომ მაისკისში მომხდარი აფეთქებები დაადასტურა, თუმცა განაცხადა, რომ აფეთქება სამხედრო ნაწილში ხანძრის გამო მოხდა.

დეტალები: ადგილობრივი ტელეგრამ არხების ცნობით, რუსეთის საჰაერო თავდაცვის სისტემები გააქტიურებულია რუსეთის მიერ ოკუპირებული ყირიმის რამდენიმე ქალაქში.

• რუსეთის მიერ დანიშნული სევასტოპოლის ე.წ. გუბერნატორი მიხეილ რაზვროჟაევი ამბობს, რომ მათმა თავდაცვის სისტემებმა დაარტყეს რამდენიმე სამიზნეს, რომლებიც ევპატორიიდან ბელბეკს უახლოვდებოდნენ.
• ამავდროულად ადგილობრივი ტელეგრამ არხების ცნობით, თვითმხილველებმა თქვეს, რომ აფეთქებები სევასტოპოლში, ბახჩისარაიში, ევპატორიასა და ნოვოფედორივკაში იყო.
• ოკუპირებული დონეცკის მაცხოვრებლების თქმით, აფეთქება იყო რუსული საბრძოლო მასალის საწყობში.

რას ამბობენ ექსპერტები: სამხედრო ექსპერტი ოლეგ ჟდანოვი ამბობს, რომ ბელბეკის აეროდრომი სევასტოპოლის მახლობლად ყირიმში ყველაზე დიდი საჰაერო ბაზაა, აფეთქებები კი სწორედ იქ გაისმა, შემდეგ კი ხანძარი გაჩნდა.

• ასევე, მისი თქმით, სხვადასხვა შეფასებით, იქ 40-მდე თვითმფრინავია განთავსებული, რომლებიც უკრაინული ჯარების პოზიციებზე თავდასხმაში აქტიურ მონაწილეობას იღებენ.
• ჟდანოვის შეფასებით, ოკუპირებულ ყირიმში ბოლოდროინდელი იდუმალი აფეთქებები ძირეულად ცვლის ვითარებას ბრძოლის ველზე და აღმოჩნდა, რომ რუსეთს მიტაცებული ტერიტორიების დაცვა არ შეუძლია.
• ინსბრუკის უნივერსიტეტის პროფესორი გერჰარდ მანგორი აცხადებს, რომ ყირიმში სამხედრო ობიექტების დაბომბვა აჩვენებს უკრაინის მაქსიმალურ მიზანს ომში.
• ანუ მისი განმარტებით, უკრაინულმა ჯარმა რუსული ჯარები უნდა განდევნოს არამხოლოდ იმ ტერიტორიებიდან, რომლებიც მათ 24 თებერვლის შემდეგ წაართვეს.