საქმე ეხება კობახიძის თავდასხმას მთავარი არხის ჟურნალისტზე — ნატალი ჯახუტაშვილის ინტერესებს მედიაომბუდსმენი დაიცავს.

რატომ არის მნიშვნელოვანი: შეგახსენებთ, რომ კობახიძე მთავარი არხის ჟურნალისტს დისკრიმინაციული მოტივით პირადი შეურაცხყოფა მიაყენა და მისი დამცირება ზიზღის ენით სცადა.

  • მან ჟურნალისტს უთხრა, რომ "პირი მოიწმინდოს" და სექსისტური ფრაზები გამოიყენა;
  • მოგვიანებით კი ჟურნალისტის შეურაცხყოფა Facebook-ზე გააგრძელა, თან პრეზიდენტი, ოპოზიცია და სხვა ჟურნალისტებიც გალანძღა;
  • მედიაკოალიცია განმარტავდა, რომ პარლამენტის წევრის ეთიკის კოდექსი წევრებს უზღუდავს მოქალაქეებთან ურთიერთობისას არაკორექტული და შეურაცხმყოფელი ლექსიკით საუბარს.
  • კოდექსის მიხედვით, პარლამენტის წევრები ვალდებული არიან არ შელახონ საჯარო ფუნქციის შესრულებისას მათთან კომუნიკაციაში მყოფი პირების პატივი და ღირსება.

მედიაომბუდსმენის განმარტებით, ამ შეურაცხმყოფელი და სექსისტური გამონათქვამებით კობახიძემ დაარღვია რეგლამენტით და ეთიკის კოდექსით დადგენილი წესები.

  • სწორედ ამიტომ, ჟურნალისტის უფლებების დასაცავად, მან პარლამენტის ეთიკის საბჭოში საჩივარი წარადგინა — ინციდენტის შესწავლა და სამართლებრივი რეაგირება მოითხოვა;
  • ასევე, დისკრიმინაციის ფაქტის დადგენის მიზნით, მედიაომბუდსმენმა საქართველოს სახალხო დამცველს მიმართა.

კობახიძის საქციელი დაგმო პრეზიდენტმა სალომე ზურაბიშვილმა და განაცხადა, რომ "ეს მხოლოდ და მხოლოდ პოლიტიკურ სისუსტეს ამჟღავნებს".

  • ასევე, ჟურნალისტური ეთიკის ქარტიამაც და განაცხადა, რომ მმართველი პარტიის ხელმძღვანელების მხრიდან სრულიად მიუღებელია, როგორც ამგვარი დამოკიდებულება ჟურნალისტისადმი, ისე ასეთი დისკრიმინაციული ლექსიკის გამოყენება.
  • მედიაკოალიციამ მიმართავა მმართველ პარტიას, დაუყოვნებლივ შეწყვიტოს ჟურნალისტების მიმართ ძალადობის წახალისება, სექსისტური და დისკრიმინაციული ენის გამოყენება.

კობახიძეს მხარს უჭერს მმართველი გუნდი და მის საქციელს ერთი-მეორის მიყოლებით ამართლებენ.

  • მამუკა მდინარაძე კობახიძის შეურაცხმყოფელი ფრაზების მაკრიტიკებლებს "ბნელი სექტის ნაწილად" მოიხსენიებს.
  • შალვა პაპუაშვილი კი ჟურნალისტზე თავდასხმის გამართლებას "პროვოკაციით" ცდილობს.
  • გენდერული თანასწორობის საბჭოს თავმჯდომარე ნინო წილოსანი კი არ პასუხობს კითხვას, იყო თუ არა კობახიძის ფრაზები დისკრიმინაციული და სექსისტური.