დაჰიპნოზებაზეც კი ვფიქრობდი, ბეჭდების მბრძანებელი რომ დამევიწყებინა

სანამ ბეჭდების მბრძანებლის ძვირადღირებული სერიალი გამოვა, ალბათ ბევრმა ჩვენგანმა გადაწყვიტა საკულტო ფილმების გადამეორება. თუმცა, ამ უკვე კლასიკად ქცეული ბლოკბასტერების შემქმნელს, როგორც ჩანს, სულ სხვანაირი დამოკიდებულება აქვს თავის ნამუშევართან. პიტერ ჯექსონის თქმით, იყო დრო, როცა ბეჭდების მბრძანებელთან დაკავშირებული ყველაფრის დავიწყება სცადა.

ოსკაროსანმა ახალზელანდიელმა რეჟისორმა ერთ-ერთ პოდკასტში აღნიშნა, რომ ჰიპნოთერაპიაზეც კი "სერიოზულად ფიქრობდა", რათა თავისი ნამუშევარი დაევიწყებინა. მიზეზი მარტივია — ჯექსონს სურდა, ფილმები რიგითი მაყურებლის თვალით ენახა და ამით დასპოილერების გარეშე ესიამოვნა.

პიტერ ჯექსონი *ბეჭდების მბრძანებლის* გადასაღებ მოედანზე

ფოტო: Getty Images

"როცა ბეჭდების მბრძანებლის ფილმებს ვიღებდით, ვფიქრობდი, რომ ყველაზე უიღბლო ადამიანი ვიყავი, რადგან მათ ისე არ ვნახავდი, როგორც ახალ კინოსურათს", — ამბობს ჯექსონი, — "გულდასაწყვეტი იყო, რომ მათ ყველა დანარჩენის მსგავსად ვერ ვუყურებდი. სერიოზულად ვფიქრობდი, ჰიპნოთერაპია გამევლო და ასე მეცადა ფილმებისა და ექვსი-შვიდი წლის განმავლობაში გაწეული შრომის დავიწყება, რათა, უბრალოდ, დავმჯდარიყავი და ყურებით მესიამოვნა. განზრახვა ბოლომდე არ მიმიყვანია, მაგრამ ბრიტანელ მენტალისტს ველაპარაკე, რომლის აზრით, ამას შეძლებდა".

მენტალისტის შემართების მიუხედავად, საეჭვოა, ჯექსონს ფილმები დავიწყებოდა. ბოლოს და ბოლოს, წლების განმავლობაში ტრილოგიის ყველაზე მცირე დეტალებსაც კი რუდუნებით ქმნიდა.

თუმცა, რეჟისორი მოხარულია, რომ ამჯერად ჰიპნოთერაპია არ დასჭირდება და ისე შეძლებს ტოლკინის ლეგენდარიუმის მიხედვით გადაღებული სერიალის ყურებას. ჯექსონის თქმით, სერიალის გამოსვლა სწორედ ამიტომ უხარია — შუახმელეთის ამ ამბებს პირველად ნახავს. სხვათა შორის, ამაზონმა მას პროექტში მონაწილეობა და სცენარის გაგზავნაც კი შესთავაზა, მაგრამ ეს არ მომხდარა.

ჯექსონის გადაღებული ტრილოგია კი დღემდე რჩება ტოლკინის შექმნილი სამყაროს ყველაზე მასშტაბურ და გავლენიან ადაპტაციად. ტრილოგიამ ჯამში $3 მილიარდამდე გამოიმუშავა და 17 ოსკარი დაიმსახურა.

რაც შეეხება სერიალს — ბეჭდების მბრძანებელი: ძალაუფლების ბეჭდები — რომელიც სიუჟეტურად წინ უსწრებს ტრილოგიის მოვლენებს, 2 სექტემბერს გამოვა.