მთიან ყარაბაღში ბოლო რამდენიმე დღეა სროლა ისმის — ვრცელდება ინფორმაცია დაჭრილებსა და დაღუპულებზე. ტრადიციულად, ორივე მხარე ერთმანეთს ადანაშაულებს.

რატომ არის მნიშვნელოვანი: 2020 წლის 10 ნოემბერს, 40-დღიანი ომის შემდეგ, სომხეთმა, აზერბაიჯანმა და რუსეთმა სამშვიდობო შეთანხმებას მოაწერეს ხელი, რომლის მიხედვითაც სომხეთს აზერბაიჯანისთვის ტერიტორიების გადაცემა მოუწია, ხოლო ლაჩინში შეიქმნა დერეფანი, სადაც რუსი სამშვიდობოები განლაგდნენ.

• ამის შემდეგ ცეცხლის შეწყვეტის შეთანხმება არაერთხელ დაირღვა და სხვადასხვა მონაცემით, მეორე ომის დასრულების შემდეგ, სომხეთ-აზერბაიჯანსა და მთიან ყარაბაღში რუსი სამშვიდობოების ჩათვლით, რამდენიმე ასეული ადამიანი დაიღუპა.

რა მოხდა: ჯერ კიდევ 28 ივლისს არცახის წარმომადგენლებმა განაცხადეს, რომ აზერბაიჯანულმა მხარემ ცეცხლი გახსნა თაღავარდისა და კარმირ შუკას თემების მიმართულებით. ოფიციალური ბაქო ბრალდებებს უარყოფდა.

• რადიო თავისუფლების სომხური ბიუროს ინფორმაციით, 30 ივლისს რუსეთის ე.წ. სამშვიდობო კონტინგენტმა, ფაქტობრივად, დაადასტურა ეს ინფორმაცია და აღნიშნა, რომ ბოლო დღეებში თაღავარდის ტერიტორიაზე ცეცხლის შეწყვეტის რეჟიმი ერთხელ დაირღვა.
• პირველ აგვისტოს მთიანი ყარაბაღის წარმომადგენლობამ განაცხადა, რომ სასაზღვრო ზონის ჩრდილოეთ და ჩრდილო-დასავლეთის მიმართულების რიგ მონაკვეთებზე, აზერბაიჯანულმა ქვედანაყოფებმა "პროვოკაციას მიმართეს ხაზის გადაკვეთის მცდელობით".

დეტალები: 2 აგვისტოს რუსეთის თავდაცვის სამინისტრომ თქვა, რომ მათი სამშვიდობო კონტინგენტის პასუხისმგებლობის ზონაში ბოლო 24 საათის განმავლობაში აზერბაიჯანის მიერ ცეცხლის შეწყვეტის რეჟიმის 3 დარღვევა დაფიქსირდა, რის შედეგადაც მთიანი ყარაბაღის შეიარაღებული ფორმირებების წარმომადგენელი დაშავდა.

• 3 აგვისტოს ბაქომ სომხეთი დაადანაშაულა სამმხრივი შეთანხმების დარღვევაში.
• მათ ხაზგასმით აღნიშნეს, რომ მთელი პასუხისმგებლობა აზერბაიჯანის ტერიტორიაზე მომხდარ ინციდენტზე ეკისრება სომხეთს, რომელმაც ჯერ კიდევ არ უზრუნველყო შეიარაღებული ფორმირებების "მეზობელი სახელმწიფოს ტერიტორიიდან გაყვანა".

ბოლო მონაცემები: არმენპრესი მთიანი ყარაბაღის წარმომადგენლებზე დაყრდნობით წერს, რომ დღეს, დაახლოებით სამ საათზე აზერბაიჯანულმა ქვედანაყოფებმა საკონტაქტო ხაზის ჩრდილო-დასავლეთ მონაკვეთზე უპილოტო საფრენი აპარატები გამოიყენეს.

• მათი ინფორმაციით, შედეგად "მთიანი ყარაბაღის თავდაცვის არმიის" ერთი სამხედრო მოსამსახურე დაიღუპა, 8 სომეხი სამხედრო კი დაიჭრა.
• აზერბაიჯანის საგარეო საქმეთა სამინისტროს განცხადებით, კი 3 აგვისტოს სომხურმა დანაყოფებმა აზერბაიჯანის ტერიტორიაზე, ინტენსიურად ისროლეს ლაჩინის რეგიონის მიმართულებით მათ პოზიციებზე, რასაც 1 ჯარისკაცი ემსხვერპლა.

კონტექსტი: როგორც OC Media წერს, სომხეთსა და აზერბაიჯანს შორის ბოლო სამშვიდობო მოლაპარაკებებში მნიშვნელოვანი ჩართულობა იყო შეერთებული შტატებისა და ევროკავშირის მხრიდან, შედეგად ბრიუსელი, რუსეთთან ერთად, ერთ-ერთი მთავარი შუამავალი გახდა.

• შეტაკებების შესახებ ცნობების გავრცელების შემდეგ, აშშ-ის სახელმწიფო მდივნის თანაშემწემ ევროპისა და ევრაზიის საკითხებში, კარენ დონფრიდმა სატელეფონო საუბარი გამართა სომხეთისა და აზერბაიჯანის საგარეო საქმეთა მინისტრებთან.
• გამოცემა აღნიშნავს იმასაც, რომ აზერბაიჯანის ურთიერთობები ევროკავშირთან შეიცვალა უკრაინაში რუსეთის შეჭრის შემდეგ, ევროკავშირის ქვეყნები ცდილობენ გაზარდონ გაზის ექსპორტი აზერბაიჯანიდან, რათა შეამცირონ თავიანთი დამოკიდებულება რუსულ გაზზე.
• მათივე თქმით, მიუხედავად უკრაინის ომის გამო რუსეთსა და დასავლეთს შორის განხეთქილებისა, მთიანი ყარაბაღის კონფლიქტი იქცა იშვიათ სფეროდ, სადაც დასავლეთი მზად არის ითანამშრომლოს რუსეთთან.