"კვლევის" შედეგები რუსეთის საპარლამენტო კომისიის სხდომის შემდეგ თანათავმჯდომარეებმა, კონსტანტინე კოსაჩევმა და ირინა იაროვაიამ ჟურნალისტებს გაუზიარეს.

რატომ არის მნიშვნელოვანი: რუსული პროპაგანდა დიდი ხანია ქმნის პრობლემას, თუმცა ომამდე და უშუალოდ ომის დროს მუშაობა განსაკუთრებით გააქტიურდა.

  • ასე პუტინის ხელისუფლება ცდილობს რუსეთის მოსახლეობა დაარწმუნოს, რომ უკრაინელები "ფაშისტები არიან და დონბასის რეგიონი მათგან უნდა გაათავისუფლონ".
  • გარდა ფაქტების დამახინჯებისა, კრემლი კონსპირაციულ თეორიებს იგონებს და ავრცელებს, რისი ერთ-ერთი მაგალითიცაა ეს "კვლევა".
  • პროპაგანდისტებისგან აქამდეც გვსმენია, თითქოს დასავლეთი ფულს ხარჯავს იმაში, რომ რუსების წინააღმდეგ "მკვლელი" ქათმები, ღამურები და კოღოები შექმნან.

დეტალები: კოსაჩევის მტკიცებით, "ტყვე უკრაინელი ჯარისკაცების სისხლის ანალიზმა აჩვენა სხვადასხვა დაავადება, რომელიც უკრაინის ტერიტორიისთვის ატიპიურია, შესაბამისი ნივთიერებების შემცველობა კი დასაშვებ ნორმებს რამდენჯერმე აღემატება".

  • ის ამის საფუძველზე ასკვნის, რომ უკრაინის ტერიტორიაზე ამ ჯარისკაცებზე ჩატარდა ექსპერიმენტები "უკიდურესად საშიშ დაავადებებზე", რომლებიც გარკვეულ პირობებში სამხედრო მიზნებისთვის შეიძლება გაავრცელონ.
  • იაროვაიას აზრით, "სავსებით შესაძლებელია საუბარი იყოს ნარკოტიკების სამხედრო პერსონალზე გამოცდაზე".

კონტექსტი: როგორც სამხედრო ექსპერტები ვარაუდობენ, უკრაინაში შეჭრის კრემლში დასახულმა გეგმამ არ გაამართლა, რადგან ისინი უკრაინისგან ამხელა წინააღმდეგობას არ ელოდნენ.

  • მსგავსი "კვლევები" და "გამოძიებები" კი პუტინის ხელისუფლებას სჭირდება იმისათვის, უკრაინის ეს წინააღმდეგობა "გაამართლოს".
  • იმის ფონზე, რომ რუსეთის მოსახლეობა სრულ საინფორმაციო ვაკუუმშია მოქცეული, ყველა კრიტიკული და სანდო მედია დაბლოკილია, კრემლი საკუთარი წყაროებით ავრცელებს ხელისუფლებისთვის ხელსაყრელ ინფორმაციას.