არხის მთავარი რედაქტორის ტიხონ ძიადკოს განცხადებით, პირველი გადაცემა დღეს, 18 ივლისს მოსკოვის დროით 20:00 საათზე გავა.

რატომ არის მნიშვნელოვანი: დოჟდმა მაუწყებლობა 3 მარტს შეწყვიტა. ამას წინ რუსეთის პროკურატურის მიერ კრიტიკული მედიების, დოჟდისა და ეხო მოსკვის ვებგვერდების დაბლოკვა უძღოდა.

  • რუსეთში მიიღეს კანონი, რომლის მიხედვითაც, დააპატიმრებენ ყველას, ვინც რუს ჯარისკაცებზე "ყალბ" ინფორმაციას გაავრცელებს.
  • დოჟდი რუსეთში 2010 წლიდან მუშაობს. პუტინის ხელისუფლებისადმი კრიტიკული ტონის გამო, რუსეთმა ის "უცხო ქვეყნის აგენტად" გამოაცხადა.

დეტალები: ტელეკომპანიამ ევროპული მაუწყებლობის ლიცენზია 6 ივნისს მიიღო.

  • დოჟდის განცხადებით, პირველ ეტაპზე სტუდიები განთავსდება რიგაში, ამსტერდამში, თბილისსა და პარიზში.
  • "ჩვენ მშვენივრად გვესმის საზღვარგარეთიდან მუშაობასთან დაკავშირებული ყველა მინუსი და პრობლემა, მაგრამ ვიმედოვნებთ, რომ გავუმკლავდებით ამ გამოწვევას. ჩვენ ველით ჩვენი მაყურებლის აქტიურ დახმარებას შემთხვევის ადგილიდან ინფორმაციის მოძიებაში".
  • ტელეკომპანიაში საუბრობენ, რომ პირველ ეტაპზე აპლიკაციები და ვებგვერდი არაა ჩართული, თუმცა მუშაობენ მათ აღდგენაზე.

დოჟდის განცხადებით, ჯერ საინფორმაციო გამოშვებები და რამდენიმე საავტორო პროგრამა დაბრუნდება ეთერში. შემოდგომაზე გეგმავენ რამდენიმე ახალი პროექტის დაწყებას.

  • "გრძელდება სისხლიანი, უაზრო ომი, რომელსაც რუსეთის ხელმძღვანელობა აწარმოებს უკრაინაში".
  • "უკრაინის ქალაქების განადგურებასთან ერთად ომი ანგრევს რუსეთის მომავალს. ქვეყანა იზოლაციაშია, ათიათასობით ადამიანი ტოვებს, რეპრესიებმა ახალ საფეხურს მიაღწია".
  • ტელეკომპანია Twitter-ზე წერს, რომ რუსეთში ოთხ თვეში 5 000-ზე მეტი საიტი დაიბლოკა, მათ შორის დამოუკიდებელი მედია და ძირითადი სოციალური ქსელები.
  • "დღეს, როგორც არასდროს, რუსეთის მოქალაქეებს უნდა ჰქონდეთ დამოუკიდებელ ინფორმაციაზე წვდომა".