რუსეთის გენერალურმა პროკურატურამ კრიტიკული მედიების, ტელეკომპანია დოჟდის და ეხო მოსკვის ვებგვერდების დაბლოკვა მოითხოვა. დეპარტამენტში განაცხადეს, რომ ისინი უკრაინასთან ომში რუსული არმიის ქმედებების შესახებ "ცრუ ინფორმაციებს" ავრცელებენ. უწყებამ მედიების ომზე გამოქვეყნებული მასალები ექსტრემისტულად მოიხსენია.

პროკურატურის განცხადებიდან მალევე ორივე ვებგვერდზე ხარვეზები დაფიქსირდა. გლობალჩეკმა გამოაქვეყნა პოსტი, სადაც ჩანს, რომ დოჟდის და ეხო მოსკვის ვებგვერდების დაბლოკვა დაიწყო. ამ დროისთვის ორივე ვებგვერდი გათიშულია.

მანამდე როსკომნადზორმა რუსულ მედიებს საომარი მოქმედებებისთვის ომის წოდება აუკრძალა. ჟურნალისტებისგან ასევე მოითხოვეს, რომ ინფორმაცია გაავრცელონ მხოლოდ ოფიციალურ პირებზე ან ჩინოვნიკებზე დაყრდნობით. დოჟდის მთავარმა რედაქტორმა ამას სამხედრო ცენზურა უწოდა.

აღსანიშნავია, რომ დოჟდი ერთ-ერთი ყველაზე კრიტიკული მედიაა მოსკოვში, რომელიც ხელისუფლების კონტროლს არ ექვემდებარება და უკრაინის პროცესების გაშუქებისას ისინი აქტიურად უწოდებდნენ მიმდინარე პროცესებს ომს, ჰქონდათ სპეცეთერი, რომელსაც ერქვა ომი უკრაინაში. ასევე, ჰქონდათ განახლებადი ინფორმაცია ვებგვერდზე, რომელიც დღეების მიხედვით ქვეყნდებოდა და ეწერა ომის პირველი დღე უკრაინაში და ა.შ.

აქამდე რუსეთმა ტელეკომპანია დოჟდი უცხო ქვეყნის აგენტად გამოაცხადა და დაავალდებულა, რომ გამოქვეყნებულ მასალაზე ეს ინფორმაცია მიუთითოს.

რუსეთის ეს ქმედება მედიის თავისუფლების შეზღუდვის კიდევ ერთი მაგალითია. ცნობილია, რომ პუტინი კრემლის ნარატივის გასავრცელებლად ძირითადად პროკრემლისტურ მედიებს იყენებს და ეს მექანიზმი რუსეთში "კარგად" მუშაობს, მისთვის არასასურველი ინფორმაციის გამავრცელებელ მედიებს კი შეზღუდვებს უწესებს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში