პრორუსული ძალადობრივი ალტ-ინფოს ერთ-ერთი ლიდერი კონსტანტინე მორგოშია ამის მიზეზად ასახელებს ხელისუფლების გადაწყვეტილებას, რომ რუსეთზე დაკისრებულ სანქციებს არ შეუერთდნენ და "ევროპელებისგან მოხვეული რიტორიკა თავზე არ მოიხვიონ". მორგოშიამ ამაზე TV პირველთან ისაუბრა.

რატომ არის მნიშვნელოვანი: ალტ-ინფო ღიად პრორუსული ძალაა, რომელიც საქართველოში არაერთი ძალადობრივი აქციის ორგანიზატორი იყო.

  • უკრაინაში რუსეთის შეჭრის შემდეგ პრემიერმინისტრის განცხადებებმა ქართული ოცნების ხელისუფლების მიმართ კრიტიკა უფრო გაამწვავა.

დეტალები: მორგოშიას თქმით, პარტიის რამდენიმე წევრი რუსეთში წავიდა, განსახილველი ძირითადი საკითხი კი უვიზო მიმოსვლის აღდგენაა.

  • მისივე მტკიცებით, დუმის დეპუტატების აბსოლუტური უმრავლესობა "შეწუხებულია და მოტივირებულია, რომ რაც შეიძლება მალე აღდგეს უვიზო მიმოსვლა".

აქამდე საქართველოს ხელისუფლების წარმომადგენლების განცხადებები არაერთხელ მოიწონეს კრემლის პროპაგანდისტებმა.

  • მარგარიტა სიმონიანმა ფეისბუქგვერდზე გააზიარა RT-ს დაწერილი ღარიბაშვილის ციტატა იმის შესახებ, რომ საქართველო არ აპირებს რუსეთს უკრაინისადმი აგრესიის გამო სანქციები დაუწესოს და დააწერა: "მეგობრებო, საქართველო გამოჯანმრთელდა".
  • თინა კანდელაკი საქართველოს დღევანდელი ხელმძღვანელობის პოზიციას "გაწონასწორებულს" უწოდებს და იმასაც ამატებს, რომ ამ ფაქტით "სასიამოვნოდ გაოცებულია".