ერთობლივი დოკუმენტი აშშ-ის ფინანსურ დანაშაულებთან ბრძოლის ქსელმა (FinCEN) და ვაჭრობის დეპარტამენტის მრეწველობისა და უსაფრთხოების ბიურომ (BIS) გამოაქვეყნეს.

რატომ არის მნიშვნელოვანი: FinCEN თანამშრომლობს BIS-თან, რათა ამ გამაფრთხილებელი დოკუმენტით აშშ-ის ფინანსურ ინსტიტუტებს დაეხმაროს.

  • მიზანი იმ კლიენტებისა და გადაზიდვების იდენტიფიცირებაა, რომლებმაც, შესაძლოა, ექსპორტის კონტროლის თავიდან აცილების მცდელობის მაღალი რისკები წარმოქმნან.

დეტალები: BIS-მა გამოავლინა რამდენიმე საერთო გადაზიდვის პუნქტი, რომლითაც, როგორც ცნობილია, ხდება შეზღუდული ან კონტროლირებადი საქონლის ექსპორტი იქამდე, სანამ დანიშნულების ადგილზე, რუსეთში ან ბელარუსში მივა.

  • მათი ცნობით, ჩამონათვალი არასრულია, თუმცა პუნქტები მოიცავს სომხეთს, ბრაზილიას, ჩინეთს, საქართველოს, ინდოეთს, ისრაელს, ყაზახეთს, ყირგიზეთს, მექსიკას;
  • ასევე, ნიკარაგუას, სერბეთს, სინგაპურს, სამხრეთ აფრიკას, ტაივანს, ტაჯიკეთს, თურქეთს, არაბთა გაერთიანებული საამიროებსა და უზბეკეთს.

ამაზე ისაუბრა დროას ლიდერმა, ელენე ხოშტარიამ და განაცხადა, რომ "ყველა ნორმალურ შემთხვევაში" მსგავსი დოკუმენტი სახელმწიფოს მხრიდან რეაგირების საფუძველი უნდა იყოს.

  • "დოკუმენტი, ერთი მხრივ, საუბრობს იმ შავ ხვრელებზე, რომელიც უკვე არსებობს სანქციების თავიდან არიდების თვალსაზრისით";
  • "მეორე მხრივ, მთელ მსოფლიოს აძლევენ სახელმძღვანელოს, რა გარიგებები, ტრანზაქციები, გადაზიდვები, ერთეულები არ შეიძლება იყოს გამოყენებული, რომ არ მოხდეს რუსული სისხლის მანქანის მომარაგება".

ხოშტარიას თქმით, როგორც ოპოზიციური პარტია, აპირებენ, რომ დოკუმენტში ჩამოთვლილ ყველა პუნქტზე ძალიან მჭიდრო კონტროლი განახორციელონ.

  • "რა თქმა უნდა, ვითანამშრომლებთ არასამთავრობო ორგანიზაციებთან, მივმართავთ მთავრობას და ისინი ვალდებულები არიან, რომ მოგვაწოდონ ინფორმაცია";
  • "ასევე, რა თქმა უნდა, ვიქნები მოხარული, თუ შევძლებთ ბიზნესთან თანამშრომლობას. იმიტომ, რომ ჩვენი მიზანია, ბიზნესმა აირიდოს თავიდან სანქციები და სადამსჯელო ღონისძიებები, ჩვენი მიზანია, არ ვიყოთ რუსული სისხლის მანქანის მომმარაგებლები".