ასტრონომებმა ჩვენი გალაქტიკის ცენტრში მდებარე ზემასიური შავი ხვრელის, მშვილდოსან A*-ს გარშემო მოძრავი უსწრაფესი ვარსკვლავი აღმოაჩინეს, რომელიც საკუთარ ორბიტაზე გადაადგილებას მხოლოდ 4 წელს ანდომებს.

ეს გახლავთ S4716, რომელიც ირმის ნახტომის ცენტრალური შავი ხვრელის ირგვლივ წამში 8 000 კილომეტრი სიჩქარით გადაადგილდება (29 მილიონი კმ/სთ). ამ დროს ის ზემასიურ ობიექტს 15 მილიარდ კილომეტრ მანძილზე უახლოვდება, რაც ასტრონომიული მასშტაბებით დიდი დისტანცია არაა. შედარებისთვის, დედამიწა მზისგან 100-ჯერ ნაკლებადაა დაშორებული.

აღსანიშნავია, რომ S4716 მნათობთა კომპაქტურ ჯგუფში ერთიანდება, რომელსაც S ჯგუფს უწოდებენ. ეს უკანასკნელი გალაქტიკის შუა ნაწილში, მშვილდოსან A*-ს მახლობლადაა განლაგებული. ასეთი სწრაფი ვარსკვლავის აღმოჩენა იმითაა მნიშვნელოვანი, რომ მან ირმის ნახტომის ევოლუციის შესახებ შესაძლოა, ღირებული ინფორმაცია მოგვცეს.

ფოტო: Peibker, et al

"ვარსკვლავები შავ ხვრელთან ასე მარტივად არ ფორმირდება. S4716 ამისთვის შიგნით უნდა გადაადგილებულიყო, რასაც მაგალითად, S ჯგუფის სხვა მნათობებთან და ობიექტებთან მიახლოებით შეძლებდა, ეს კი ორბიტის დაპატარავებას გამოიწვევდა", — აცხადებენ ავტორები.

ამ ჯგუფში ყველაზე კარგად ცნობილი ვარსკვლავი S2-ა, რომლის ორბიტული პერიოდიც 16 წელია. მისი მეშვეობით მშვილდოსან A*-ზე ბევრი რამ შევიტყვეთ, თუმცა ჩვენი პერსპექტივიდან ის ამ რეგიონს ეფარება. ყველაფრის მიუხედავად, მეცნიერებმა S4716-ს მახასიათებლები გამოავლინეს, რისთვისაც 5 ტელესკოპის მიერ შეგროვებული მონაცემები გამოიყენეს. მათი ნაშრომი გამოცემაში The Astrophysical Journal გამოქვეყნდა.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.