ბრიტანეთის სამეფო ოჯახმა მამის დღე ტრადიციულად ახალი ფოტოს გამოქვეყნებით აღნიშნა. კემბრიჯის ჰერცოგმა და ჰერცოგინიამ ინსტაგრამზე სურათი გაავრცელეს, რომელზეც პრინცი უილიამი შვილებთან ერთადაა გადაღებული.

"მსოფლიოში ყველა მამას და პაპას ვულოცავთ მამის დღეს", — წერია პოსტის აღწერაში.

პრინცი უილიამი მალე თავისი 40 წლის იუბილეს იზეიმებს. გასულ წელს მისი დაბადების დღის აღნიშვნა სწორედ მამის დღეს დაემთხვა.

კემბრიჯის ჰერცოგს, ბრიტანეთის მომავალ მეფეს სამი შვილი ჰყავს, რომლებიც მის შემდეგ არიან ტახტის მემკვიდრეების სიაში. პრინცი ჯორჯი 2013 წელს დაიბადა, პრინცესა შარლოტი — 2015 წელს, პრინცი ლუი კი — 2018 წელს. სხვათა შორის, ეს უკანასკნელი ცოტა ხნის წინ მთელი მსოფლიოს ყურადღების ცენტრში მოექცა, როცა დიდი ბებიის საიუბილეო ღონისძიებებზე იცელქა.

გასული წლის მამის დღეზე სამეფო ოჯახის წევრებმა ასევე პატივი მიაგეს გარდაცვლილ პრინც ფილიპს. გამოქვეყნებულ ვიდეოში ნაჩვენები იყო პრინცი უილიამი და პრინცი ჰარი მამასთან, პრინც ჩარლზთან ერთადაც; აგრეთვე ქეით მიდლტონი მამამისთან ერთად, რომელმაც იგი ქორწილში მიაცილა.