თბილისში, პარლამენტის შენობასთან, მაღაროელთა მხარდამჭერ აქციაზე გუშინ დაკავებული სამი პირის სასამართლო პროცესი 1 კვირით გადაიდო. ისინი დარბაზიდან გაათავისუფლეს.

რუსთავი 2-ის ინფორმაციით, სასამართლო 19 მაისს განახლდება. იმ ბრალდების განხილვა, რომელსაც მათ პოლიცია უყენებს, სასამართლოს ჯერ არ დაუწყია. პროცესის გადადება დაკავებულის ადვოკატებმა მოითხოვეს, რათა გაცნობოდნენ იმ მასალებს, რომლებიც ბრალდების მხარემ წარადგინა.

შსს-ს ინფორმაციით, სამივე მათგანი ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (სამართალდამცავი ორგანოს თანამშრომლის კანონიერი განკარგულებისადმი ან მოთხოვნისადმი დაუმორჩილებლობა) მუხლების დარღვევისთვის არიან დაკავებულები.

9 მაისს, გვიან ღამით, თბილისში აქცია მიმდინარეობდა, სადაც მოძრაობა აუდიტორია 115-ის წევრები ტყიბულში, მინდელის სახელობის შახტში ოთხი მუშის დაღუპვას აპროტესტებდნენ.

გუშინ ოთხი მეშახტე დაახლოებით 400 მეტრი სიღრმის შახტში ჩავარდა, ისინი გარდაცვლილები იპოვეს. აქციის მონაწილეები პარლამენტის შენობასთან რუსთაველის გამზირის გადაკეტვას ცდილობდნენ, დაპირისპირების შემდეგ, დააკავეს აქციის რამდენიმე მონაწილე.

ადმინისტრაციულ სამართალდარღვევათა კოდექსის 166-ე მუხლის დარღვევისთვის დამტკიცების შემთხვევაში, გათვალისწინებულია ჯარიმა 100 ლარის ოდენობით ან, თუ საქმის გარემოებებისა და დამრღვევის პიროვნების გათვალისწინებით ამ ზომის გამოყენება არასაკმარისად იქნება მიჩნეული – ადმინისტრაციულ პატიმრობას 15 დღემდე ვადით. 173-ე მუხლის დარღვევისთვის კი, გათვალისწინებულია ჯარიმა 250 ლარიდან 2 000 ლარამდე ან ადმინისტრაციულ პატიმრობას 15 დღემდე ვადით.