საქართველოს შინაგან საქმეთა სამინისტროს ინფორმაციით, გუშინ, 9 მაისს თბილისში, პარლამენტის შენობასთან, მაღაროელთა მხარდამჭერ აქციაზე დაკავებული სამი პირის სასამართლო დღეს გაიმართება. უწყების ინფორმაციით, სამივე მათგანი ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (სამართალდამცავი ორგანოს თანამშრომლის კანონიერი განკარგულებისადმი ან მოთხოვნისადმი დაუმორჩილებლობა) მუხლების დარღვევისთვის არიან დაკავებულები.

ადმინისტრაციულ სამართალდარღვევათა კოდექსის 166-ე მუხლის დარღვევისთვის დამტკიცების შემთხვევაში, გათვალისწინებულია ჯარიმა 100 ლარის ოდენობით ან, თუ საქმის გარემოებებისა და დამრღვევის პიროვნების გათვალისწინებით ამ ზომის გამოყენება არასაკმარისად იქნება მიჩნეული – ადმინისტრაციულ პატიმრობას 15 დღემდე ვადით. 173-ე მუხლის დარღვევისთვის კი, გათვალისწინებულია ჯარიმა 250 ლარიდან 2 000 ლარამდე ან ადმინისტრაციულ პატიმრობას 15 დღემდე ვადით.

9 მაისს, გვიან ღამით, თბილისში აქცია მიმდინარეობდა, სადაც მოძრაობა აუდიტორია 115-ის წევრები ტყიბულში, მინდელის სახელობის შახტში ოთხი მუშის სავარაუდო დაღუპვას აპროტესტებენ. რამდენიმე საათის წინ ოთხი მეშახტე დაახლოებით 400 მეტრი სიღრმის შახტში ჩავარდა, ისინი გარდაცვლილები იპოვეს. აქციის მონაწილეები პარლამენტის შენობასთან რუსთაველის გამზირის გადაკეტვას ცდილობენ, ადგილზე იმყოფება პოლიცია. დაპირისპირების შემდეგ, დააკავეს აქციის რამდენიმე მონაწილე.