ტყიბულში, მინდელის სახელობის შახტიდან, მაშველებმა ოთხი ადამიანის ცხედარი უკვე ამოასვენეს. აღნიშნული ინფორმაცია, On.ge-ის სამაშველო სამსახურმა დაუდასტურა. ტყიბულში, სამაშველო სამუშაოები დაახლოებით 14 საათის განმავლობაში მიმდინარეობდა.

გუშინ საღამოს, სავარაუდოდ, მწყობრიდან გამოსული ტექნიკის გამო, ოთხი მეშახტე სიმაღლიდან გადავარდა. რკინიგზელთა პროფკავშირის წარმომადგენლის, ილია ლეჟავას ცნობით, სიმაღლე, საიდანაც მუშები გადავარდნენ, 400 მეტრია.

შსს-ს ცნობით, გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.

პრემიერმინისტრის დავალებით, შემთხვევის ადგილზე გაემგზავრნენ საქართველოს ეკონომიკისა და მდგრადი განვითარების მინისტრი გიორგი გახარია, რეგიონული განვითარებისა და ინფრასტრუქტურის მინისტრი ზურაბ ალავიძე, ეკონომიკის სამინისტროს ტექნიკური და სამშენებლო ზედამხედველობის სააგენტოს წარმომადგენლები, ასევე - ჯანდაცვის სამინისტროს შრომის დეპარტამენტის უფროსი და შრომის ინსპექტორების ჯგუფი.