დემოკრატიული მოძრაობა - ერთიანი საქართველოს ლიდერი, ნინო ბურჯანაძე "ღამის მგლების" საქართველოში ჩამოსვლაზე საუბრისას ვაჟა-ფშაველას "სტუმარ-მასპინძელთან" ავლებს პარალელს და ამბობს, რომ "მოსულ სტუმარს პატივისცემა უნდა".

"სტუმარ-მასპინძელი საქართველოში მე მგონი ბევრს აქვს ნასწავლი და თუ არ დაგვავიწყდება ჩვენი დიდი წინაპრების დანატოვარი მემკვიდრეობა და ქართველობაზე ხელს არ ავიღებთ, არ დაგვავიწყდება მაშინ ისიც, რომ მოსულ სტუმარს პატივისცემა უნდა," - აღნიშნა ბურჯანაძემ "ღამის მგლების" საქართველოში ვიზიტზე და დასძინა, რომ მათი ვიზიტის მიზანი სამამულო ომის დროს გარდაცვლილების პატივის მიგებაა.

რუსეთის პრეზიდენტთან დაახლოებული მოტოციკლეტისტების დაჯგუფება "ღამის მგლების" ორი წევრი მივიდა დღეს ვაკის პარკში, სადაც მეორე მსოფლიო ომის მონაწილეები არიან შეკრებილნი და აღნიშნავენ ფაშიზმზე გამარჯვების დღეს. როგორც ღამის მგლების ერთმა წევრმა ჟურნალისტებს უთხრა, ისინი ადგილზე იმყოფებიან, რათა "პატივი მიაგონ" მეორე მსოფლიო ომში დაღუპულთა ხსოვნას.

"ღამის მგლების" საქართველოში შემოსვლის შესახებ ინფორმაცია On.ge-მ 3 მაისს გაავრცელა. საქართველოს შინაგან საქმეთა სამინისტროს პრესსამსახურის ინფორმაციით, საქართველოს საზღვარი "ღამის მგლების" ერთმა წევრმა გადმოკვეთა. უწყებაში განმარტავენ, პირი ქვეყანაში "ღამის მგლების" მიერ დაანონსებულ ვიზიტამდე, ამოსაცნობი ატრიბუტიკის გარეშე, შემოვიდა.