ირლანდიის სენატმა რუსეთის ქმედებები უკრაინაში გენოციდად აღიარა. სენატორი, მარკ დალი Twitter-ზე რეზოლუციის ტექსტსაც ავრცელებს, სადაც ნათქვამია, რომ რუსეთის ფედერაციის მიერ უკრაინაში უკანონო შეჭრა გენოციდის აქტია.

რუსეთის ქმედებები უკრაინაში სხვადასხვა ქვეყანამ უკვე აღიარა გენოციდად, მათ შორისაა, კანადა, ჩეხეთი, ესტონეთი. თავად უკრაინამ შესაბამისი რეზოლუცია 14 აპრილს მიიღო.

12 აპრილს ამერიკის შეერთებული შტატების პრეზიდენტმა, ჯო ბაიდენმა მოსახლეობასთან გაზის გაზრდილ ტარიფებზე საუბრისას განაცხადა, რომ რუსეთმა უკრაინაში გენოციდი მოაწყო. ამას უკრაინის პრეზიდენტმა, ვოლოდიმირ ზელენსკიმ ნამდვილი ლიდერის ჭეშმარიტი სიტყვები უწოდა.

საფრანგეთის პრეზიდენტმა, ემანუელ მაკრონმა კი განაცხადა, რომ რუსეთის ქმედებებისთვის გენოციდის წოდებისგან თავს შეიკავებს, რადგან რუსები და უკრაინელები "ძმები არიან". ამის პასუხად, უკრაინის საგარეო საქმეთა სამინისტრომ განაცხადა, რომ მაკრონის მიდგომა იმედგაცრუებას იწვევს. საგარეოს სპიკერის, ოლეგ ნიკოლენკოს თქმით, უკრაინელ და რუს ხალხს შორის "ძმობის" მითი საბოლოოდ დაიმსხვრა, როდესაც თებერვალში უკრაინაში რუსული რაკეტები გამოჩნდნენ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.