უკრაინის პრეზიდენტის ადმინისტრაციის უფროსის მრჩევლის, მიხაილო პოდოლიაკის განცხადებით, რუსეთსა და უკრაინას შორის დიალოგი მხოლოდ ჰუმანიტარულ საკითხებზე მიმდინარეობს.

"დღესდღეისობით მოლაპარაკებების პროცესი პოლიტიკურ და დიპლომატიურ ნაწილში შეჩერებულია. ჰუმანიტარულ ნაწილში მუშაობს — ტყვეების გაცვლა, ჩვენი ხალხის ევაკუაციის მცდელობები", — თქვა მან.

პოდოლიაკის თქმით, პოლიტიკურ ნაწილში მოლაპარაკებების შეჩერების მიზეზი ისაა, რომ რუსეთი "რეალურ მოვლენებს არაადეკვატურად უყურებს". ამასთან, ის აღნიშნავს, რომ შეწყდა არა მხოლოდ ოფიციალური მოლაპარაკებები, არამედ არაფორმალური კონსულტაციებიც.

მოლაპარაკებების შეწყვეტის შესახებ რუსეთისა და უკრაინის წარმომადგენლებმა მაისის შუა რიცხვებში განაცხადეს. ბოლოს დელეგაციები ერთმანეთს თურქეთში მარტის ბოლოს შეხვდნენ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.