22 წლისა და 50 დღის ფოქსტერიერი 17 მაისს მსოფლიოს ყველაზე ხანდაზმული ცოცხალი ძაღლი გახდა და გინესის რეკორდიც დაამყარა. ძაღლი მთელი ამ დროის განმავლობაში სამხრეთ კაროლინაში მზრუნველი ოჯახის წევრებთან ერთად ცხოვრობს, რომლებიც მას 2000 წლის მარტის შემდეგ ზრდიან და უვლიან.

ოჯახის თქმით, 22 წლის ძაღლის რეკორდზე ფიქრი სრულიად შემთხვევით დაიწყეს, როცა საღამოს საინფორმაციო გამოშვებას უსმენდნენ. მათ ტელევიზიით გაიგეს, რომ 21 წლის ჩიხუახუა ყველაზე ხანდაზმულ ცოცხალ ძაღლად დასახელდა და ამის შემდეგ გადაწყვიტეს, რომ გინესის რეკორდების სააპლიკაციო ფორმა შეევსოთ.

ფოტო: GUINNESS WORLD RECORDS

გინესის რეკორდების ადმინისტრაციამ ოჯახს განაცხადი მალევე დაუდასტურა და ყველაზე ხანდაზმული ცოცხალი ძაღლის წოდებაც მათ 22 წლის ოთხფეხა მეგობარს გადასცა.

ოჯახის თქმით, ახალ წოდებასა და პოპულარობას ძაღლის ცხოვრებაზე არ უმოქმედია, ის მთელ დღეებს ისევ ძილში ატარებს, უყვარს ქანთრის ჟანრის მუსიკის მოსმენა და კარგი კვება. 22 წლის იუბილე კი განსაკუთრებულად აღნიშნეს და ფოქსტერიერმა საჩუქრად დიდი ტორტიც მიიღო.

როგორც გინესის რეკორდის მინიჭებისას აღნიშნეს, 22 ძაღლს სწორად შედგენილი კვების დიეტა აქვს და ჯანმრთელობის მხრივაც თავს შესანიშნავად გრძნობს, რაც მისი ოჯახის დამსახურებაა.