საქართველოს პრეზიდენტის, სალომე ზურაბიშვილის განცხადებით, ერთიანობა იმისთვის, რომ საქართველო დადგეს თავის ადგილზე,აუცილებელია. მისი თქმით, სწორედ ეს არის საზოგადოების დაკვეთა, რომელიც პოლიტიკურმა პარტიებმა ჯერ კიდევ ვერ გაითავისეს.

"ეს არის დაკვეთა საზოგადოების, შეიძლება, ჯერ კიდევ ვერ გაითავისეს ის, რომ ასეთი დაკვეთა არსებობს, რამეთუ საზოგადოებას არა აქვს ყველა ის საშუალებები, რომ თავისი დაკვეთა პოლიტიკურ პარტიებამდე მიიტანოს და გააგებინოს თავისი ხმა და ვიტყოდი, რომ ეს დაკვეთა კიდევ უფრო გაძლიერდა ამ პერიოდში, იმიტომ, რომ როგორც კი ხედავ, რომ მსოფლიო შენს ირგვლივ იცვლება, ჩნდება ახალი გამოწვევები, ახალი შესაძლებლობები", — განაცხადა მან.

ზურაბიშვილის თქმით, მით უმეტეს, პატარა ქვეყანაში, რომელიც თავს ისე დაცულად ვერ გრძნობს, კიდევ უფრო დიდი მოთხოვნაა, რომ გაერთიანებული იყოს. ის აღნიშნავს, რომ ყველაზე დიდი კრიზისების, ტრაგედიების და ომების შემდგომ, ამ ყველაფერს მოჰყვება გადაფასება და ახალი უსაფრთხოების ფორმების ძიება, რომელიც არ დაუშვებს ამ ტრაგედიების გამეორებას.

"ასე შეიქმნა თავის დროზე გაერო, ევროკავშირი, NATO და დღეს ამის მოლოდინში ვართ, რომ განახლდეს ეს ორგანიზაციები. რუსეთის აგრესიამ უკრაინაში შექმნა ახალი რეალობა, რომელმაც უკვე დაამარცხა რუსეთის ამბიციები და გეგმები ევროპაში, შეიკრა და გაძლიერდა უკრაინის ეროვნული იდენტობა, ევროკავშირი ქვეყნების ერთიანობა და მათი შეგნება, რომ უსაფრთხოებაზე თვითონ ევროპელებმა უნდა იზრუნონ და მეტი პასუხიმგებლობა აიღონ", — თქვა პრეზიდენტმა.

მისი განცხადებით, რუსეთმა კი კიდევ ერთხელ ყველას დასანახად და გასაგებად, აგრესორისა და ნგრევის მომტანის სასტიკი სახე აჩვენა და როგორც არ უნდა დასრულდეს ეს ანაქრონული ომი, უკრაინელები უკვე გამარჯვებულები არიან, რადგან მათ საკუთარი ქვეყნის დამოუკიდებლობისთვის უდიდესი ფასი გადაიხადეს და გაამყარეს ის.

"ძნელი სათქმელია, ხვალინდელი ევროპა რა პრინციპებით იხელმძღვანელებს და როგორ გაარჩევს სხვადასხვა ქვეყნების გეოპოლიტიკურ მნიშვნელობას — უკრაინის — როგორც ცენტრალური ევროპის სტაბილურობის გარანტის, კავკასიის — როგორც აღმოსავლეთთან სტრატეგიული ხიდის, რუსეთის იზოლაციის პირობებში, თუ ხმელთაშუა ზღვის მიმართულებით აღმოსავლეთ ბალკანეთის როლს, ამ გეოპოლიტიკურ მნიშვნელობას დაუქვემდებარებს პოლიტიკურ პრინციპებს, თუ გამოიყენებს ერთგვარად შერეულ კრიტერიუმებს, როგორ დააბალანსებს გაფართოების აუცილებლობასა და ეკონომიკური თუ სოციალური გაღრმავების საჭიროებას", — აღნიშნავს ის.

პრეზიდენტის თქმით, ამ მოსალოდნელი ცვლილების ფონზე, საჭიროა ჩვენ დავინახოთ ჩვენი ადგილი და შესაძლებლობები. ის აღნიშნავს, რომ საქართველოს წინ ძალიან დიდი პერსპექტივები იხსნება, თუკი შევძლებთ ჩვენი ადგილის დანახვასა და გამყარებას.

"ვერ განვსაზღვრავთ რა იქნება რუსეთის რეაქცია, მორალური მარცხის და იზოლაციის შედეგად, რომელიც შესაძლოა, განახლებული აგრესიით მიუბრუნდეს სხვა მეზობლებს, მათ შორის, საქართველოს, რისი საფრთხეც არსებობს, თუნდაც რეფერენდუმის ფორმით.

მთავარია, ამ ახალი შესაძლებლობების და საფრთხეების ფონზე, ჩვენ ვიცოდეთ რა გვინდა და როგორ გვინდა, და რა არის ჩვენი ფასეულობები. მთავარია, ვაჩვენოთ მსოფლიოს, თუნდაც თვითონ ორჭოფობდნენ, რომ შემდეგი ნაბიჯების გადადგმის შესახებ ჩვენი არჩევანი ურყევია", — თქვა მან.

ზურაბიშვილის განცხადებითვე, ეს იმას ნიშნავს, რომ ამ მიზნის ქვეშ ყველა ძალა უნდა იყოს გაერთიანებული, არა მხოლოდ სიტყვით, არამედ საქმით, მისი თქმით, პოლიტიკური ამბიციებით განპირობებული დაპირისპირება მხოლოდ ქვეყნის ინტერესებს არ ეწინააღმდეგება, საბოლოოდ ამ პარტიების მიმართ ნდობასაც აზარალებს. ის აღნიშნავს, რომ მთავრობისა თუ ოპოზიციის ნებისმიერი ნაბიჯი ამ მიზანს უნდა ემსახურებოდეს, ხოლო მიზანი ძალიან ცხადი უნდა იყოს და არ ბადებდეს ეჭვს გულწრფელ არჩევანსა და მიმართულებებზე.