ეკონომიკის მინისტრმა, ლევან დავითაშვილმა პარლამენტში ინტერპელაციის წესით მოსმენისას თქვა, რომ საკუთრებაში აიღებენ ბორჯომის აქციების ნაწილს სანქცირებული პირებისგან.

"კონკრეტული არის ის, რომ ჩვენ საკუთრებაში ავიღებთ, და ეს არ არის დროებითი, ბორჯომის აქციების ნაწილს სანქცირებული პირებისგან იმისათვის რომ კომპანია ბორჯომში კონტროლის კუთხით კითხვა აღარ იყოს და კომპანიამ შეძლოს სრულფასოვანი ფუნქციონირება", — თქვა მან.

დავითაშვილმა ისაუბრა, რომ ბორჯომთან დაკავშირებულ საკითხებზე მიაწოდეს ყველა საერთაშორისო პარტნიორს. მისი თქმით, ამ საკითხს აქვს ბევრი ნიუანსი.

"დიახ ჩვენ გავაკეთეთ განცხადებები, თუმცა ძალიან ბევრი ინფორმაციის გაცემა სხვადასხვა ეტაპზე ჩვენ არ შეგვეძლო. რადგან ჩვენ კონკრეტულ მოლაპარაკებებში ვიყავით კომპანიასთან. აქ არ არის არანაირ სანქციების გვერდით ავლაზე, ამაზე ინფორმაცია მივაწოდეთ ყველა საერთაშორისო პარტნიორს. საუბარია იმაზე, სახელმწიფომ დიახ საკუთრებაში აიღოს ბორჯომის აქციების ნაწილი, რომელიც საშუალებას მოგვცემს, რომ კომპანია აღარ იყოს კონტროლის ქვეშ სანქცირებული პირების.

თუმცა აქაც არის ძალიან ბევრი ნიუანსი, რომლის გავლაც ხდებოდა სხვადასხვა მარეგულირებელთან, რომლებმაც სანქციები შემოიღეს. ეს ეხება ევროპელ და ბრიტანელ მარეგულირებლებს, ეროვნულ ბანკთან ერთად. რა თქმა უნდა, ამას ძალიან ბევრი იურიდიული პროცესის შესწავლა დასჭირდა და ჯერ კიდევ არ დაგვისრულებია. უახლოეს ხანებში მთავრობა მიიღებს შესაბამის გადაწყვეტილებას", — აღნიშნავს ის.

მთავრობა ბორჯომის მფლობელი კომპანიის შეთავაზებას განიხილავს, რომლის ფარგლებშიც კომპანია მზადაა საქართველოს მთავრობას წილების ნაწილი გადასცეს. მთავრობის განცხადებით, პრემიერმინისტრმა ირაკლი ღარიბაშვილმა ეკონომიკური საბჭოს წევრებს ბორჯომის შესახებ კონკრეტული დავალებები მისცა.

IDS BORJOMI International-ის განცხადებით, მისმა მაკონტროლებელმა კომპანიამ საქართველოს მთავრობას წარუდგინა ოფიციალური წინადადება წილების ნაწილის უსასყიდლოდ გადაცემის შესახებ. მათი თქმით, ეს ნაბიჯი მთავრობას საერთაშორისო კომპანიის მართვაში მონაწილეობის მიღების საშუალებას მისცემს.

კომპანია ბორჯომმა 29 აპრილიდან სანქციების გამო ორივე ქარხანაში წარმოება დროებით შეაჩერა. 5 მაისს ბორჯომმა 49 თანამშრომელი სამსახურიდან გაათავისუფლა. კომპანიაში თქვეს, რომ შექმნილ ვითარებაში იძულებული გახდნენ დასაქმებულთა ხელშეკრულებაში ცვლილება შეეტანათ, რაზეც თანამშრომელთა ნაწილი არ დათანხმდა.

ბორჯომის წარმოების შეჩერების შემდეგ, პრემიერმინისტრმა, ირაკლი ღარიბაშვილმა განაცხადა, რომ საკითხზე აქტიურად მუშაობენ და მოსახლეობას მალე ეტყვიან სასიამოვნო ინფორმაციას.