2021 წელს საქართველოს მოსახლეობის საშუალო თვიური ხარჯების მოცულობა წლიურად 14,4%-ით, 1,29 მილიარდ ლარამდე გაიზარდა. ამის შესახებ საქსტატის კვლევიდან ხდება ცნობილი.

ფოტო: საქსტატი

ანგარიშის მიხედვით, საშუალო თვიური ხარჯების მოცულობა ერთ შინამეურნეობაზე 11,5%-ით არის გაზრდილი და 1 158 ლარს შეადგენს, ხოლო ერთ სულზე 14%-იანი ზრდით, 345,9 ლარს უტოლდება.

საქსტატის ინფორმაციით, 2021 წელს ქვეყნის მოსახლეობის მთლიანი ხარჯების 6,8% არასამომხმარებლო, 23,1% — არაფულადი, ხოლო 70,1% სამომხმარებლო ფულადი ხარჯი იყო.

თავის მხრივ, სამომხმარებლო ფულადი ხარჯების მოცულობა კატეგორიების მიხედვით ასე ნაწილდება:

  • სურსათზე, სასმელზე, თამბაქოს ნაწარმზე გაწეული ხარჯი — 43,7%;
  • საცხოვრებელ სახლზე, წყალზე, ელექტროენერგიაზე, გაზზე და სხვა სათბობზე გაწეული ხარჯი — 12,7%;
  • ჯანმრთელობის დაცვაზე გაწეული ხარჯი — 11,7%;
  • ტრანსპორტზე გაწეული ხარჯი — 10,9%;
  • ტანსაცმელსა და ფეხსაცმელზე გაწეული ხარჯი — 3,5%;
  • საოჯახო მოხმარების საქონელზე გაწეული ხარჯი — 3,4%;
  • განათლებაზე გაწეული ხარჯი — 2%;
  • სხვა სამომხმარებლო ხარჯები ჯამში — 12,1%.

მოსახლეობის ხარჯების ზრდა ქვეყანაში არსებულ მაღალ ინფლაციას უკავშირდება. 2021 წელს საქართველოში საშუალოდ 9,6%-იანი ინფლაცია იყო, რაც ინფლაციის მიზნობრივ მაჩვენებელს 6,6 პროცენტული პუნქტით აღემატება.

საქსტატის კვლევა, საქართველოს მოსახლეობის შემოსავლების შესახებ ინფორმაციასაც მოიცავს. ანგარიშში წერია, რომ 2021 წელს, წინა წელთან შედარებით, საქართველოს მოსახლეობის საშუალო თვიური შემოსავლების მოცულობა 13,9%-ით, 1,36 მილიარდ ლარამდეა გაზრდილი.