საქართველოს ახალგაზრდა იურისტთა ასოციაცია საქართველოს იუსტიციის უმაღლეს საბჭოს მიმართავს გამოსაცდელი ვადით დანიშნული მოსამართლეების, ლევან მურუსიძისა და მაია სულხანიშვილის ავტომატურად უვადოდ გამწესების გადაწყვეტილება არ მიიღოს. ორგანიზაციაში მიაჩნიათ, რომ იუსტიციის უმაღლესმა საბჭომ გადაწყვეტილება საქართველოს საკონსტიტუციო სასამართლოს გადაწყვეტილების კანონმდებლობაში ასახვამდე არ უნდა მიიღოს.

საია 5 მაისს გავრცელებული განცხადებით საქართველოს მთავრობას და პარლამენტსაც მიმართავს. ორგანიზაციაში მიაჩნიათ, რომ ამ უწყებებმა საკონსტიტუციო სასამართლოს გადაწყვეტილების შესახებ ინფორმაცია საზოგადოებისთვის ხელმისაწვდომი უნდა გახადონ.

"გამოაქვეყნონ დაგეგმილი საკანონმდებლო ცვლილებების პროექტი და სასამართლოს მიერ დადგენილ ვადაში უზრუნველყონ საკანონმდებლო ცვლილებების განხორციელება ყველა დაინტერესებული პირის ჩართულობით," - აღნიშნავენ საიაში.

მსგავსი შინაარსის განცხადება პირველ მაისს ხუთმა არასამთავრობო ორგანიზაციამ გაავრცელა. საერთაშორისო გამჭვირვალობა - საქართველო, ინფორმაციის თავისუფლების განვითარების ინსტიტუტი, ადამიანის უფლებათა ცენტრი, კონსტიტუციის 42-ე მუხლი და პარტნიორობა ადამიანის უფლებებისთვის მიიჩნევენ, რომ საქართველოს პარლამენტმა საკონსტიტუციო სასამართლოს გადაწყვეტილების აღსრულების მიზნით პირველ ივლისამდე განსახორციელებელი ცვლილებებით უნდა მოაწესრიგოს სამწლიანი ვადით უკვე გამწესებული მოსამართლეების საკითხი. მათი აზრით, პარლამენტმა, შესაძლოა, საკითხი მოაწესრიგოს იმგვარად, რომ უკვე განწესებულ მოსამართლეებს უფლება მიეცეთ სამწლიანი ვადის ამოწურვამდე მიმართონ საბჭოს მათი უვადოდ გამწესების საკითხზე, რა დროსაც საბჭო ინდივიდუალურად იმსჯელებს თითოეულ ასეთ განცხადებაზე და მიიღებს დასაბუთებულ გადაწყვეტილებას.