ნაციონალური მოძრაობის პოლიტსაბჭოს თავმჯდომარე, კობა ნაყოფია მთავარი არხის გენერალურ დირექტორთან ნიკა გვარამიასთან ციხეში შეხვედრის შემდეგ აცხადებს, რომ მისთვის პრიორიტეტია არხმა შეფერხების გარეშე იფუნქციონიროს. ნაყოფიას თქმით, გვარამია თავს კარგად გრძნობს და მხნედ არის.

"[ნიკა გვარამიამ] შემოუთვალა ყველა ჟურნალისტს და მადლობას უხდის, მოვუყევი იმ დიდ სოლიდარობაზე, რომელიც გამოიჩინა ზოგადად ჟურნალისტურმა კორპუსმა მის მიმართ. ყველას დიდ მადლობას უხდის და მისთვის პრიორიტეტია, რომ მთავარმა იფუნქციონიროს შეფერხების გარეშე და უნდა გაკეთდეს ყველაფერი იმისთვის რომ მთავარი არხი შევინახოთ, შევინარჩუნოთ და ეს არის ხალხის არხი", — ამბობს ის.

ნაყოფიას თქმით, გვარამიას ორ პრიორიტეტულ საკითხზე ესაუბრა — მთავარ არხსა და ექსპრეზიდენტ მიხეილ სააკაშვილის ჯანმრთელობის მდგომარეობაზე. ნაციონალური მოძრაობის წევრის განცხადებით, გვარამიამ მას უთხრა, რომ სააკაშვილს აქვს ცოტა დრო და ამიტომ, ყველაფერი უნდა გაკეთდეს მისი უცხოეთში გადაყვანისთვის.

სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: