ბრიუსელში საქართველოს პრემიერმინისტრის, ირაკლი ღარიბაშვილისა და NATO-ს გენერალური მდივნის, იენს სტოლტენბერგის შეხვედრა გაუქმდა. ინფორმაცია ამის შესახებ NATO-ს ოფიციალურ ვებსაიტზე იძებნება, თუმცა დეტალები განხილული არ არის.

16 მაისს ღარიბაშვილი ბრიუსელში გაემგზავრა. პრემიერმინისტრმა შეხვედრები უკვე გამართა ევროპული საბჭოს პრეზიდენტთან, შარლ მიშელთან და ევროპარლამენტის პრეზიდენტთან, რობერტა მეცოლასთან. ღარიბაშვილმა აღნიშნა, რომ შეხვედრებზე ევროკავშირის წარდგენილ კითხვარს განიხილავდნენ.

6 მაისს საქართველომ კითხვარის მეორე ნაწილის შევსება დაასრულა. საქართველოს ევროკავშირის წევრობის კითხვარი 11 აპრილს გადასცეს. ქვეყანამ ევროკავშირის წევრობის კანდიდატის სტატუსის მიღებაზე განაცხადს ხელი 3 მარტს მოაწერა.