ცოტა ხნის წინ ევროპის მაუწყებელთა კავშირმა ოფიციალური განცხადება გამოაქვეყნა, რომელშიც აღნიშნულია, რომ 6 ქვეყნის ჟიურიმ ხმა, სავარაუდოდ, წესების დარღვევით მისცა. შესაბამისად, მეორე ნახევარფინალსა და ფინალში ამ ქვეყნების ხმები სხვა ქვეყნების შედეგების მიხედვით გამოთვალეს, რომელთაც ხმის მიცემის მსგავსი ისტორია აქვთ.

"ევროპის მაუწყებელთა კავშირი ევროვიზიაზე ხმის მიცემის პროცესით მანიპულაციის ნებისმიერი მცდელობის შესახებ ეჭვს სერიოზულად ეკიდება და აქვს უფლება, ხმის მიცემის ოფიციალური ინსტრუქციის შესაბამისად მსგავსი ხმები გააუქმოს მიუხედავად იმისა, თუ რა გავლენა ექნებოდა ამ ხმებს შედეგებზე", — ვკითხულობთ განცხადებაში.

6 ქვეყანა, რომლის ჟიურიმაც ხმა წესების დარღვევით მისცა, განცხადებაში აღნიშნული არაა, თუმცა BBC-ის ჟურნალისტმა ტვიტერზე ქვეყნებს შორის საქართველო დაასახელა:

"ევროპის მაუწყებელთა კავშირმა გამოაცხადა, რომ ევროვიზიის მეორე ნახევარფინალში 6-მა ქვეყანამ ხმა წესების დარღვევით მისცა. სწორედ ამის გამო აზერბაიჯანისა და საქართველოს შედეგები ევროვიზიის ევროპის მაუწყებელთა კავშირის აღმასრულებელმა ზედამხედველმა, მარტინ ესტერდალმა ჟიურის ნაცვლად წაიკითხა".

ევროვიზია 2022 წლის გამარჯვებული უკრაინა გახდა. ქვეყნის წარმომადგენელმა ჯგუფმა KALUSH ORCHESTRA-მ ფინალში სიმღერა Stefania შეასრულა და 631 ქულით უკრაინას ევროფესტივალზე მესამე გამარჯვება მოუტანა. აღსანიშნავია, რომ ბენდმა ტელემაყურებლისგან უმაღლესი, 439 ქულა დაიმსახურა, სხვადასხვა ქვეყნის ჟიურისგან კი 5-ჯერ მიიღო ასევე უმაღლესი შეფასება — 12 ქულა.

ევროვიზიის შედეგების მიხედვით, საქართველოს ჟიურიმ უკრაინას მაქსიმალური 12 ქულიდან 6 ქულა დაუწერა, რამაც საზოგადოების უკმაყოფილება გამოიწვია. ამის ფონზე საზოგადოებრივმა მაუწყებელმა გამოაქვეყნა განცხადება, რომელშიც წერია, რომ საქართველოს ეროვნულმა ჟიურიმ უკრაინას 12 ქულა დაუწერა.

"ევროვიზიის სიმღერის კონკურსზე საქართველოდან ეროვნულმა ჟიურიმ ყველაზე მაღალი შეფასება — პირველი ადგილი უკრაინას მისცა, რაც 12 ქულას ნიშნავს. ამას მოწმობს ნოტარიულად დამოწმებული დოკუმენტი, რომელიც გადაეგზავნა ევროვიზიის სიმღერის კონკურსის ორგანიზატორებს.

საზოგადოებრივი მაუწყებელი ამ საკითხთან დაკავშირებით ევროვიზიის კონკურსის ორგანიზატორებთან დეტალებს არკვევს.

საზოგადოებრივი მაუწყებელი კიდევ ერთხელ ულოცავს უკრაინას დამსახურებულ გამარჯვებას", — ვკითხულობთ განცხადებაში.

ამავე თემაზე: