ცოტა ხნის წინ ევროვიზია 2022 წლის გამარჯვებული უკრაინა გახდა. ქვეყნის წარმომადგენელმა ჯგუფმა KALUSH ORCHESTRA-მ ფინალში სიმღერა Stefania შეასრულა და 631 ქულით უკრაინას ევროფესტივალზე მესამე გამარჯვება მოუტანა. აღსანიშნავია, რომ ბენდმა ტელემაყურებლისგან უმაღლესი, 439 ქულა დაიმსახურა, სხვადასხვა ქვეყნის ჟიურისგან კი 5-ჯერ მიიღო ასევე უმაღლესი შეფასება — 12 ქულა.

ქართველი მაყურებლისგან გამარჯვებულმა უკრაინამ 12 ქულა მიიღო, თუმცა სოციალურ ქსელებში საზოგადოება უკმაყოფილებას გამოთქვამს, რადგან მაყურებლებისგან განსხვავებით, საქართველოს ეროვნულმა ჟიურიმ უკრაინას მხოლოდ 6 ქულა დაუწერა.

საერთო უკმაყოფილების ფონზე საზოგადოებრივმა მაუწყებელმა სპეციალური განცხადება გამოაქვეყნა:

"ევროვიზიის სიმღერის კონკურსზე საქართველოდან ეროვნულმა ჟიურიმ ყველაზე მაღალი შეფასება — პირველი ადგილი უკრაინას მისცა, რაც 12 ქულას ნიშნავს. ამას მოწმობს ნოტარიულად დამოწმებული დოკუმენტი, რომელიც გადაეგზავნა ევროვიზიის სიმღერის კონკურსის ორგანიზატორებს.

საზოგადოებრივი მაუწყებელი ამ საკითხთან დაკავშირებით ევროვიზიის კონკურსის ორგანიზატორებთან დეტალებს არკვევს.

საზოგადოებრივი მაუწყებელი კიდევ ერთხელ ულოცავს უკრაინას დამსახურებულ გამარჯვებას".

ჯერჯერობით დოკუმენტი, რომლითაც მოწმდება, რომ საქართველოს ჟიურიმ უკრაინას მართლაც 12 ქულა დაუწერა, არ გასაჯაროებულა.

შეგახსენებთ, რომ საქართველოს წარმომადგენელი წლევანდელ ევროვიზიაზე ჯგუფი ცირკუს მირკუსი იყო, სიმღერით Lock Me In, თუმცა, ბენდმა მეორე ნახევარფინალურ ტურში ბოლო ადგილი დაიკავა და ფინალში მოხვედრა ვერ შეძლო.