ცნობილმა მომღერალმა ბრიტნი სპირსმა ინსტაგრამზე გამომწერებსა და გულშემატკივრებს სამწუხარო ამბავი გაუზიარა. ბრიტნის თქმით, ორსულობა შეუწყდა.

"მწუხარებით გატყობინებთ, რომ ჩვენი საოცარი შვილი ორსულობის ადრეულ ეტაპზე დავკარგეთ. ეს ნებისმიერი მშობლისთვის გამანადგურებელია. შეიძლება, თქვენთვის ორსულობის ამბავი უფრო გვიან უნდა გაგვეზიარებინა, უბრალოდ ზედმეტად აღფრთოვანებულები ვიყავით და კარგი ამბავი გითხარით.

ჩვენი ერთმანეთისადმი სიყვარული ძალას გვაძლევს. ჩვენი ლამაზი ოჯახი აუცილებლად დიდი იქნება. თქვენი მხარდაჭერის მადლიერი ვართ. ასეთ რთულ მომენტში გთხოვთ, განმარტოების უფლება მოგვცეთ", — ვკითხულობთ ბრიტნისა და მისი პარტნიორის საერთო განცხადებაში.

ბრიტნი სპირსს 2 შვილი ჰყავს. მესამე ორსულობის შესახებ საზოგადოებას ჯერ კიდევ აპრილში შეატყობინა. ახალ ამბავს ფანები სიხარულით შეხვდნენ, რადგანაც ბრიტნის თქმით, მეურვეობის პერიოდში დაორსულებისა და ბავშვის გაჩენის უფლებას არ აძლევდნენ.

შეგახსენებთ, რომ ბრიტნი სპირსი 13-წლიანი მეურვეობისგან ნოემბერში გათავისუფლდა. აღსანიშნავია, რომ მეურვეობის გაუქმების საქმეში უდიდესი როლი სწორედ ბრიტნი სპირსის ერთგულმა მსმენელებმა ითამაშეს: ფანებმა სოციალურ ქსელებში დაიწყეს მოძრაობა #FreeBritney (თავისუფლება ბრიტნის) და ამტკიცებდნენ, რომ მომღერალს სასამართლოს მიერ დანიშნული მეურვე, კონკრეტულად კი მამამისი, ჯეიმს სპირსი, არასათანადოდ ეპყრობოდა და თავისუფლებას საჭიროზე მეტად უზღუდავდა.