პრემიერმინისტრის, ირაკლი ღარიბაშვილის განცხადებით, საუბარი პატიმრის საზღვარგარეთ გადაყვანაზე არის "სპეკულაცია და არაადეკვატური". მისი თქმით, "ამ ქვეყანაში ყველა უნდა დაემორჩილოს კანონს".

"ვინც გაბედა და კანონზე მაღლა დააყენა თავისი თავი, თქვენ ნახეთ ყველამ, როგორი ადგილი მივუჩინეთ. მათ შორის, მაგ ვაჟბატონ მელიას და ყველას, იგივე, პატიმარ სააკაშვილს. ყველა მოქალაქე, ვინც კანონს დაარღვევს, დაისჯება კანონის შესაბამისად. დანარჩენი სპეკულაციები, გადაყვანა, გადმოყვანა არ მაინტერესებს.

პატიმარია? კეთილი ინებოს, მოიხადოს ბოლომდე სასჯელი. საქართველოში ყოველგვარი საუბარი გადაყვანაზე და ა.შ. არის სრული სპეკულაციები, რა თქმა უნდა, არაადეკვატურია ეს ყველაფერი, რა თქმა უნდა, საფუძველი არ არსებობს და ყველას მოგიწოდებთ, შევინარჩუნოთ ეს მშვიდობა, გავუფრთხილდეთ ამ მონაპოვარს, რაც არის მშვიდობა, სტაბილურობა და განვითარებაზე, შენებაზე ვიფიქროთ", — აცხადებს ის.

11 მაისს გავრცელდა ინფორმაცია, რომ სააკაშვილი ვივამედში გადაიყვანეს. 12 მაისს გიული ალასანიამ მიხეილ სააკაშვილი ვივამედში მოინახულა და აღნიშნა, რომ ექსპრეზიდენტი ძალიან სუსტად არის. მისი თქმით, სააკაშვილის მდგომარეობა ახლა უფრო მძიმე იყო, ვიდრე ორი დღის წინ, როცა პენიტენციურში ინახულა.

10 მაისს იუსტიციის მინისტრმა, რატი ბრეგაძემ განაცხადა, მიხეილ სააკაშვილს, შესაძლო გართულებების თავიდან არიდების მიზნით, შესთავაზებდნენ, რომ გადაიყვანონ კლინიკა ვივამედში, სადაც მას გამოკვლევებს ჩაუტარებენ. ამავე დღეს სააკაშვილმა კლინიკაში გადასაყვანად რამდენიმე პირობა დაასახელა.

ამავე თემაზე: