"რა დანაშაულიც არ უნდა ჰქონდეს ჩადენილი, ადამიანის ჯანმრთელობას უნდა მიხედო", — ამის შესახებ ქართული ოცნების დეპუტატმა, გია ვოლსკიმ ექსპრეზიდენტ, მიხეილ სააკაშვილზე საუბრისას განაცხადა.

"მისი სიცოცხლე არ უნდა დააყენო საფრთხის ქვეშ. მე კიდევ ერთხელ გავიმეორებ, რომ მას ინტენსიურად, პრინციპულად და ყოველდღიურად მოუწოდებდნენ, არ შეეწყვიტა შიმშილობა, ლეტალური შედეგიც რომ დამდგარიყო [...] არცერთისგან არ ისმის, რომ სააკაშვილმა მიიღო სრულფასოვანი სამედიცინო მომსახურება, ყველა ამბობს იმას, რომ გაყვანა მისი აუცილებელია, ვინაიდან ფსიქოლოგიური მდგომარეობა მისი შერყეულია იმის გამო, რომ თავი არ მიაჩნია დამნაშავედ", — თქვა მან.

დეპუტატი ფიქრობს, რომ სამედიცინო კონსილიუმი მისი პოლიტიკური მხარდაჭერისთვისაა შექმნილი და ისინი პოლიტიკურად ანგაჟირებულები არიან.

"იმ დროს, როდესაც სააკაშვილი გამოდგა ტრიბუნაზე სასამართლოში და მოუწოდა ხალხს ჯანყისაკენ, ეს მაშინ ვთქვი და ახლა ვამბობ, რომ მაქვს საფუძველი ვიფიქრო, რომ ის ჯგუფი, კონსილიუმი, რომელიც შეკრიბეს მისი პოლიტიკური მხარდაჭერისათვის კონკრეტულმა ადამიანებმა, მნიშვნელოვაწილად პოლიტიკურად არიან ანგაჟირებულები", — აღნიშნავს ვოლსკი.

გუშინ, 11 მაისს გავრცელდა ინფორმაცია, რომ სააკაშვილი ვივამედში გადაჰყავდათ. არსებული ინფორმაციით, ექსპრეზიდენტი უკვე კლინიკაშია, თუმცა შესაბამის უწყებებს ოფიციალური განცხადება ამ დრომდე არ გამოუქვეყნებიათ. ამასთან, სხვადასხვა მედიის კადრებში ჩანს, რომ ტერიტორიაზე პოლიციელები არიან მობილიზებული. On.ge პენიტენციურ სამსახურთან ცდილობს დაკავშირებას, თუმცა ისინი ზარებს ამ დრომდე არ პასუხობენ.

10 მაისს იუსტიციის მინისტრმა, რატი ბრეგაძემ განაცხადა, მიხეილ სააკაშვილს, შესაძლო გართულებების თავიდან არიდების მიზნით, შესთავაზებდნენ, რომ გადაიყვანონ კლინიკა ვივამედში, სადაც მას გამოკვლევებს ჩაუტარებენ. ამავე დღეს სააკაშვილმა კლინიკაში გადასაყვანად რამდენიმე პირობა დაასახელა.