ამერიკის შეერთებული შტატების წარმომადგენლობითმა პალატამ, სამ მაისს, მიმდინარე წლის ბიუჯეტი დაამტკიცა, რომელშიც რუსეთის წინააღმდეგ ქმედებებზეა საუბარი.

Deutsche Welle-ს ცნობით, მომდევნო დღეებში, დოკუმენტი სენატმა უნდა დაამტკიცოს, შემდეგ კი პრეზიდენტმა დონალდ ტრამპმა მოაწეროს ხელი.

დოკუმენტის ერთ-ერთი თავი უკრაინისა და საქართველოს ტერიტორიულ მთლიანობას შეეხება, სადაც საუბარია, რომ აშშ-ის ადმინისტრაციას ეკრძალება იმ ქვეყნების მხარდაჭერა, რომლებიც აფხაზეთისა და ცხინვალის დამოუკიდებლობას აღიარებენ. ასევე, ეკრძალება რუსეთის მიერ ამ ორი რეგიონის ოკუპაციის მხარდაჭერა.

გარდა ამისა, ფინანსთა სამინისტრომ უნდა გაუწიოს მონიტორინგი იმას, რომ ამერიკულმა კომპანიებმა არ განახორციელონ ისეთი ქმედებები, რაც უკრაინის ტერიტორიულ მთლიანობასა და სუვერენიტეტს დაარღვევს. ასევე, მთავრობამ ხელი უნდა შეუშალოს ამერიკული ინვესტიციების გადინებას ყირიმში.

დოკუმენტში საუბარია მექანიზმებზე, რითიც მოსკოვის გავლენა უნდა შემცირდეს აშშ-ს საშინაო პოლიტიკაზე და აღიკვეთოს რუსეთის საიდუმლო სამსახურების საქმიანობა ამერიკაში. ასევე, საუბარია სპეციალური კომიტეტის შექმნაზე, რომელიც რუსეთის გავლენას შეეწინააღმდეგება სხვა ქვეყნებში.