ამერიკაში, მამამ და დედინაცვალმა, თავიანთი ხუთი შვილიდან ორზე მეურვეობის უფლება დაკარგეს მას შემდეგ, რაც იუთუბზე ვიდეოები ატვირთეს, რომლებშიც ჩანს, თუ როგორ ეხუმრებიან 9 და 12 წლის ბავშვებს ბოროტად.

BBC-ის ინფორმაციით, ერთ-ერთ ვიდეოში, 9 წლის კოდის, მამა და დედინაცვალი ეუბნებიან, რომ მასთან დამშვიდობება მოუწევთ, რადგან ის სხვა ოჯახმა იშვილა.

მერილენდელმა მაიკ და ჰეზარ მარტინებმა კი განაცხადეს, რომ ისინი ბავშვებზე ემოციურად არ ძალადობდნენ და ვიდეოები, უბრალოდ, დადგმული ხუმრობა იყო.

სასამართლოს გადაწყვეტილებით, ბავშვებზე მეურვეობის უფლება მათ ბიოლოგიურ დედას დაუბრუნდა.

"ემა და კოდი უკვე ჩემთან არიან, მე ისინი სასწრაფოდ დამიბრუნეს და ბავშვები უკვე კარგად გრძნობენ თავს, ისინი ისევ ბედნიერად თამაშობენ" - ამბობს არასრულწლოვნების ბიოლოგიური დედა, როუზი ჰოლი.

ჰოლმა, ვიდეოების ნახვის შემდეგ, ადვოკატს, ტომ კონლონს მიმართა:

"ჩემთვის უმძიმესი სანახავი იყო, რომ ვხედავდი, როგორ დაამცირეს ჩემი შვილები".

ჰოლის ადვოკატმა BBC-ის განუცხადა, რომ ბავშვები დედასთან უსაფრთხოდ არიან. მარტინების ადვოკატი კი საქმეზე კომენტარს არ აკეთებს.

ერთ-ერთ ვიდეოში, მარტინები ხალიჩაზე მელანს აწვეთებენ, რომელიც კოდის ოთახშია, შემდეგ კი მას აბრალებენ ამის ჩადენას და ეჩხუბებიან. ვიდეოში, რომელიც მარტინებმა უკვე წაშალეს, ჩანს, რომ 9 წლის ბიჭი ისტერიულად ტირის.

მამის და დედინაცვლის ბოროტ ხუმრობაში შედის კოდის Xbox-ის ნაჯახით დამტვრევაც.

მარტინებმა 22 აპრილს იუთუბზე ვიდეო ატვირთეს, სადაც ისინი ბოდიშს იხდიან, 28 აპრილს კი, Good Morning America-ს ეთერში განაცხადეს, რომ პოლიციამ, ბავშზე ძალადობის ბრალდებით, მათ წინააღმდეგ გამოძიება დაიწყო.

მარტინების თქმით, ბავშვებმა ხანდახან იცოდნენ, რომ ხუმრობა იქნებოდა, თუმცა ვიდეოების დიდი ნაწილი რეალური იყო.

ბოლო ცნობებით, მარტინების წინააღმდეგ სხვა სანქციები არ გატარდება.