საპარტნიორო ფონდი 5 მილიონ 400 ათასი აშშ დოლარის ოდენობის ინვესტიციას განახორციელებს, ლოპოტას ტბაზე არსებული სასტუმროს გასაფართოვებლად. დღეს, ფონდმა ხელი მოაწერა შპს ლოპოტა ინვესტმენტთან პარტნიორთა შეთანხმებას, რომელსაც პრემიერმინისტრი, გიორგი კვირიკაშვილი დაესწრო.

მთავრობის ადმინისტრაციის ცნობით, სასტუმროს გახსნა 2018 წლის ბოლოს იგეგმება, ხოლო კომპლექსის გაფართოება ითვალისწინებს დამატებით 85 სასტუმრო ნომერს, ადმინისტრაციულ შენობას, 300 ადგილიან საკონფერენციო დარბაზს, შატოს, რესტორანს, კაფე-ბარს, ფიტნეს კლუბს, დახურულ და ღია საცურაო აუზებს.

გიორგი კვირიკაშვილმა განაცხადა, რომ გაფართოების შემდეგ, კომპლექსი კიდევ უფრო მეტ ტურისტს მოიზიდავს. პრემიერი მიიჩნევს, რომ სახელმწიფო კერძო ბიზნესს "წაეხმარა" იმ ნაწილში, რომლის განვითარებაც საჭიროდ ჩათვალა:

"მალე ჩვენ გვექნება პრაქტიკულად სრულიად ახალი, გაცილებით უფრო მასშტაბური, დახვეწილი, ყველა კომპონენტის მქონე ტურისტული მიმართულება - ლოპოტა, სადაც განთავსდება საკონფერენციო დარბაზები, საცურაო აუზები, იქნება ღვინის წარმოება და შატო. ეს არის ინვესტიცია სახელმწიფოსთან ერთად და ვფიქრობ, რომ ძალიან წარმატებული პროექტია. ამ კომპლექსის განვითარება არის კერძო ბიზნესის დამსახურება".

საპარტნიორო ფონდმა ლოპოტა ინვესტმენტთან ერთად უკვე დააფუძნა ერთობლივი კომპანია - შპს ლოპოტა. სამშენებლო სამუშაოებს შეასრულებს კომპანია CIC, ხოლო მშენებლობას ზედამხედველობას გაუწევს კომპანია Colliers.