6 მაისს ბათუმის მთავრობის სახლთან აქციის მონაწილეების დაკავებაზე GDI აცხადებს, რომ ხელისუფლება აგრძელებს მისთვის მიუღებელი პოლიტიკური სიტყვისა და მშვიდობიანი შეკრების უკანონო, რეპრესიული გზით ჩახშობას. ორგანიზაცია აღნიშნავს, რომ მედიის მიერ გადაღებული კადრების მიხედვით, 7 მაისს აქციის დაშლის მომენტისათვის დემონსტრანტებზე ბევრად მეტი პოლიციელი იყო ადგილზე მობილიზებული და თითო აქტივისტს რამდენიმე პოლიციელი არაპროპორციული ძალის გამოყენებით აკავებდა.

"GDI-ის პოზიციით, ხელისუფლება პოლიციის მიერ მშვიდობიანი შეკრების მონაწილეების, ოპოზიციონერების დაკავებით აგრძელებს კრიტიკულად განწყობილ პირთა მიმართ რეპრესიულ პრაქტიკას, რომლის დროსაც სახელმწიფო სათანადოდ არ უზრუნველყოფს გამოხატვისა და შეკრების თავისუფლებას და ამ უფლებებს ხშირად არღვევს სწორედ დაკავებების სახით ადმინისტრაციულ სამართალდარღვევათა კოდექსის 173-ე და 166-ე მუხლებზე მითითებით", — აცხადებენ ორგანიზაციაში.

მათივე თქმით, ვიდეოკადრებიდან ასევე ჩანს რამდენიმე შემთხვევა, როდესაც პოლიციელებმა ძალის გამოყენებით დააკავეს აქციის მონაწილეები მხოლოდ იმის გამო, რომ დემონსტრანტებმა მათ კითხვა დაუსვეს, შეეპასუხნენ ან/და ხმამაღლა მიმართეს.

"აღნიშნული ლახავს გამოხატვისა და შეკრების თავისუფლებას და ემსახურება მხოლოდ პროტესტის ჩახშობასა და კრიტიკის ცენზურას, რაც ქვეყანაში არადემოკრატიული, ავტორიტარული რეჟიმის ჩამოყალიბებას უწყობს ხელს", — ვკითხულობთ განცხადებაში.

GDI აღნიშნავს, რომ პოლიციამ, როგორც ადამიანის უფლებებისა და თავისუფლებების დაცვის ერთ-ერთმა გარანტმა, ადმინისტრაციულ სამართალდარღვევათა კოდექსის ბოროტად გამოყენებით უკანონო დაკავებების პრაქტიკა უნდა შეწყვიტოს და პატივი სცეს შეკრებისა და გამოხატვის თავისუფლებას.

აჭარის მთავრობის სახლთან ექსპრეზიდენტის სამკურნალოდ საზღვარგარეთ გადაყვანის მოთხოვნით აქცია გუშინ, 6 მაისს გაიმართა. საღამოს აქციაზე ხმაური და დაპირისპირება იყო. პოლიციამ 25 ადამიანი დააკავა.

შსს განცხადებით, აქციის მონაწილეებმა აჭარის მთავრობის სახლის წინ გაშალეს კარვები და გამოიწვიეს გზის სავალი ნაწილის ხელოვნურად ბლოკირება. მათივე მტკიცებით, როცა ხალხის რაოდენობა შემცირდა გზის გახსნა სცადეს, რასაც აქტივისტები შეეწინააღმდეგენ.

უწყება მათ ადმინისტრაციულ სამართალდარღვევათა კოდექსის 173-ე და 166-ე მუხლების დარღვევას ედავება, რაც წვრილმან ხულიგნობას და პოლიციისადმი დაუმორჩილებლობას გულისხმობს.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.