რომის პაპის, ფრანცისკეს განცხადებით, მან რუსეთის პრეზიდენტს, ვლადიმერ პუტინთან მოსკოვში შეხვედრის სურვილი გამოთქვა, თუმცა მისგან პასუხი ვერ მიიღო. ინფორმაციას ამის შესახებ Reuters ავრცელებს.

რომის პაპმა იტალიურ მედიას, ასევე, განუცხადა, რომ რუსეთის პატრიარქი კირილე, რომელმაც ომს სრული მხარდაჭერა გამოუცხადა, "პუტინის საკურთხევლის ბიჭი ვერ გახდება".

"ვშიშობ, პუტინს არ შეუძლია და არ სურს, რომ ახლა შეხვედრა შედგეს, მაგრამ როგორ არ შეაჩერო ამდენი სისასტიკე?", — ამბობს ის.

10 აპრილს რომის პაპმა, ფრანცისკემ ბზობის მსახურების შემდეგ ომში ჩართულ მხარეებს სააღდგომო ზავის დადებისკენ მოუწოდა. რომის პაპმა რუსეთზე აშკარა მინიშნებით თქვა: "როგორი გამარჯვებული იქნება ის, ვინც დროშას ნანგრევებზე აღმართავს".

მან რუსეთის უკრაინაში შეჭრა არაერთხელ დაგმო. 6 აპრილს ის ბუჩადან ჩატანილ დროშას ემთხვია.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში